KHAWTHLIR

Thilpek hlân

Chhimphei Group YMA chuan, nimin khan Remna Ni pualin State Referral Hospital-ah ṭanpuina Rs. 1,00,000 an hlân. Lawngtlai Bullet Club pawhin nimin khan Remna Ni pualin Lawngtlai khawpuia damdawi-in pathum - District Hospital, Christian Hospital leh Lairam Christian Medical Centre hnenah Poor Fund atan Rs. 2,000 ṭheuh an pe bawk.

Thing phun

Aizawla Electric Veng branch YMA chuan an branch kum 50 tlin, golden jubilee lawm nan nimin zing khan an veng thlanmual ramah thing an phun. Electric Veng YMA-te hian thing ṭiak 100 chuang an phun a,ṭha takin an hung nghal a ni.

Inhlawh mek

Mahatma Gandhi National Rural Employment Gurantee Act hnuaiah tunlai hian Siaha district-ah inhlawhna siam mek a ni a, ni 14 chhung siam a ni ang. Siaha district-ah tun ṭuma ni 14 inhlawhna awm tur nen kumin 2016-17 chhungin ni 28 inhlawhna siam a nihna tur a ni.

LDMPCU conf.

Lunglei District Milk Producer Cooperative Union Ltd. chuan June 29, 2016 khan Lunglei Farm Venga an pisaah General Assembly an hmang. LDMPCU hian kum 2015-16 chhungin bawnghnute an hralhna aṭangin cheng nuai 20.1 an hmu chhuak a, tun dinhmunah primary society 21 an nei mek.

Free clinic

Aizawl Thunders bultumin nimin khan Remna Ni pualin Samtlang khuaah a thlawna inentirna buatsaih a ni a, doctor-te'n mi 400 chuang hriselna dinhmun an endik a, a thlawnin damdawi an sem.

Sa man tisang

Champhai DC Vanlalngaihsaka hoa June 29, 2016-a ṭhukhawm chuan Champhai khawpuia bawng sa man Rs. 50-in an tisang. Kg. khat zelah a sa pangngai Rs. 250 ni ṭhin chu Rs. 300, a ruh Rs. 200 ni ṭhin chu Rs. 250, a kawchhung Rs. 200 ni ṭhin chu Rs. 250, a thin Rs. 300 ni ṭhin chu Rs. 350 a ni tawh ang.