District khawpui tinah Remna Ni lawm

Nimin khan Mizoram dis-trict khawpui hrang hrangah Remna Ni lawm a ni. District khawpuiah chuan YMA sub-headquarters bultumin lawm niin, Saihaah chuan MTP bultumin lawm a ni a; Lawngtlaiah chuan Central YMA bultuma hman tura ruahman ni mah se, DC office bultumin hman a ni.

Remna Ni hi Lungleiah chuan Saikuti Hall-ah lawm a ni a; Organising Committee chairman R Lalnunthara'n inkhawm a kaihruai. Khuallian Rev.Dr CL Hminga'n thu sawiin, remna tel lo chuan hmasawnna a bahlah tih a sawi a, "Remna tluantling nei turin mi zawng zawng kan pawimawh," a ti.

Inkhawmah hian Remna Ni puala thutiam chham rual a nih bakah martarte sûnna hun hman a ni a; political party hrang hrang aiawhte'n thu sawiin, a huhoa Remna Ni lawm chu lawmawm an tih thu an sawi hlawm. Tlawmngai pawl hrang hrang aiawhte leh Lunglei DC-in thu an sawi bawk.

Lungleiah hian Lunglei khawpui chhunga YMA branch hrang hrangte'n Cheraw an entir a; BCM Choir bakah, zaipawl dangte leh mimal zaithiam
ṭhahnem tak an zai a ni.

Saiha-ah chuan MTP Gen. Hqrs. bultumin Council Venga Multipurpose Hall-ah lawm a ni a, Mara Autonomous District Council chief executive member RT Zachono leh Saiha addl. DC N Chakhai ten an hmanpui.

Inkhawmah hian Remna Ni puala zirlaite tana essay inziahsak lawmman te, marathon race-a ti ṭhate leh Remna Ni lam hawia chanchinbua thuziak ṭhate hnenah lawmman sem a ni.

Lawngtlaiah chuan DC Dr A Muthamma hoin DC Conference Hall-ah lawm a ni a, thupui atan 'Hmasawnna atan remna leh muanna' tih an hmang. Remna Ni lawm nan khawlai dungah banner leh poster eng emaw zat târ niin, sorkar office hrang hrangte’n an office-te an chei bawk.

Lawngtlai DC chuan, Remna Ni kum 30-na hman a ni chu lawm-awm a tih thu sawiin, "Rambuai lai nun harsa tak paltlang a, Mizoramah remna leh muanna a awm thei hi a lawmawm. Remna lo awm theihna atan tha thawhtu zawng zawng chuan chawimawi an phû hle a ni," a ti.

Serchhipah chuan Remna Ni pualin YMA sub-headquarters kaihhruaina hnuaiah zing karah Bazar Veng leh AOC inkarah Remna Kawngzawh neih a ni a, chawhma dar 10:30-ah DC Conference Hall-ah lawmna hun hman niin, DC Dr Lalrozama khuallian a ni.

Serchhipa Remna Ni hman-naah hian political party hrang hrangte'n thu an sawi bakah, he ni puala essay inziahsaka ti ṭhate hnenah lawmman sem a ni. YMA Sub-Hqrs. Zaipawl leh mimal zaithiamte an zai a, fiamthu thiamte an che bawk.

Mamitah chuan Chhimveng YMA Hall-ah Remna Ni lawm a ni a, khuallian, Mamit DC Lal-biaksangi'n Remna Ni puanzar a pawt pharh.

Inkhawm hi MUP sub-hqrs, Mamit president Z Sangliana'n a kaihruai a, thupui 'Remna mi tin tan' tih chu Kohhran Hruaitute Joint Committee chairman Rev. Lalhruaitluanga Ralte-in a sawi a, political party aiawh ṭheuhin thu an sawi bawk. Mamit SDC Lalzikpuii kaihhruaiin thutiam chham rual a ni a; essay inziahsiak leh Peace Rally-a ti ṭhate hnenah lawmman sem a nih bakah, zaipawl leh mimal zaithiamte an zai a ni.

Kolasib-ah chuan Diakkawn YMA Hall-ah lawm a ni a, DC H Lalengmawia khuallian niin, SP C Lalzahngoa khualzahawm a ni. Khuallianin Remna Ni puanzar a pawt pharh. Chawhnu lamah Peace Concert neih a ni.

Kolasib-a inkhawm hi Organising Committee chair-man C Liankunga'n a kaihruai a, Kolasib sub-hqrs. YMA vice president Lalrinmawia Ngente kaihhruaiin thutiam chham a ni a, Organising Committee secretary Thomas D Lalengliana'n report a pe. Prominent journalist S Lalhmachhuana'n remna chan-chin a sawi a; zaithiamte an zai bakah lemchante entir a ni bawk.

Champhaiah chuan zing dar 6-ah Remna Ni pualin kohhran hrang hrangah ṭawng-ṭai rualna hun hman a ni a; zing dar 9-ah CHANEM tualah a khuhhawnna hun hman niin, baloon rocket kah chhuah a ni.

Chawhma dar 10:30-ah Kah-rawt Field-ah a lawmna inkhawm thawh khatna neih a ni a; Orga-nising Committee chairman C Lalbiakzauva'n kaihruaiin, khual-lian TT Zothansanga, par-liamentary secretary-in Remna Ni puanzar a pawt pharh. Champhai DC Vanlalngaihsaka'n baloon a chhuah thung. A lawmna thawh hnihnaah YMA branch hrang hrang-in hnam lâm chi hrang hrang an entir a, zaipawlte leh mimal zaithiamte an zai bakah, politi-cal party leh tlawmngai pawl hrang hrang aiawhte'n thu an sawi.

Champhaia Remna Ni Organi-sing Committee chuan nimin khan Remna Ni pualin District Hospital, District Jail, Metakhen, TNT, Emmanuel After Care Centre, Genesareth Gospel Home leh Grace Receiver Home-ahte thilpek an hlân.