MURA-in Remna Ni-ah Black Day an hmang

Mizoram Underground Returnees Association (MURA) chuan, nimin Remna Ni-ah khan Black Day an hmang a, puan dum sinin an pung khawm. "MURA member in leh lo nei lote tan in hmun leina leh a sak nan sorkarin cheng nuai 50 ṭheuh min pe rawh se," an ti.

MURA-te hian Black Day an hmannaah hian resolution an pass a; in hmun lei nan leh in sak nan cheng nuai 50 pek an phût bakah hian, "MURA member eizawnna ngêlnghet nei lote tan eizawnna bul ṭan nan leh intuamhlawm nan cheng nuai 20 ṭheuh sorkarin min pe rawh se," an ti a; Mizoram buai vanga in leh lo leh nuna chán chhungte hnenah special compensation cheng nuai 10 ṭheuh pek an phût thu an tarlang.

MURA resolution chuan, MURA member district danga mite tan sorkarin in hmun leina leh a sakna Sousing for All hnuaiah emaw, special case-in emaw pek an phut thu a tarlang a; "MURA member-te harsatna hi sorkarin Cabinet level-ah min ngaihtuah ve tawh rawh se," a ti bawk.

MURA hian MNF leh India sorkar inremna, Memorandum of Settlement an pawm ve lo tih an lo sawi tawh a ni.