LC leh VC inthlan hun a ṭha kan ti - CM Zoramthanga

Chief minister Zoramthanga, MNF president ni bawk chuan, village council leh local council inthlan hun chu ṭha an tih thu a sawi a, "Inthlan theih lohnaah pawh boruak muanawm hunah a hma thei anga neih a ṭha kan ti," a ti.

Nimina vote a thlak zawha thuthar thehdarhtute zawhna chhángin Zoram­thanga chuan, thil hre chiangin, Covid-19 chu tun aṭanga kar hnihah emaw, thla khatah emaw reh dawn se chuan chumi hun atan chuan sawn ṭha an tih thu a sawi a, "Hun a kal zel a, Covid-19 vei an pung zel a ni," a ti a, tun hun hi inthlan hun ṭha zawka an ngaih thu a sawi.

Zoramthanga chuan, VC-te chu hun pawhsei a nih tawh thu sawiin, "Hun pawhseisak a, an nihna chelh reng chu anmahni lam pawhin nuam an ti lo. Pathian zarah thi pawh kan la awm lo a, hripui kan do kawnga kan thawhhona pawh entawntlak an tih lai, kan la ziaawm lai tak a ni. Kan boruak a la ṭha lo zel thei a, a ṭha a nih chuan a lawmawm," a ti.

MNF President chuan, hmun ṭhen­khata VC leh LC inthlan neih theih a nih dawn loh chungchangah, "Kan tunlai khawvel dinhmun enin remruattute remruatna hi ṭha kan ti," a ti a; boruak a muanawm hunah remruattute'n inthlan hun tur an ruat leh mai tur thu a sawi.

Nimina inthlan chu ruling leh opposition atan ṭhatna leh ṭhat lohna bik a awm loh thu sawiin Zoramthanga chuan, "Campaign hun chhung a inang vek a, a vote thlaktu tur pawh a ngai vek. Engti kawng mahin ruling-in advantage an neih bik emaw, opposition-in advantage an neih loh bik a awm thei lo," a ti.