Ramria RAT tihtàwpna thupek HFW Secy-in Sept. 3-ah a chhuah September 4-ah sût leh nghal a ni

Health Secretary-in notifi­cation a chhuahah chuan, "Assam leh Tripura aṭanga Mizoram rawn luhna Vairengte leh Kanhmuna RAT tih ṭhin chu thu leh awm hma chu titawpin, he notification chhuah ní aṭang hi chuan thermal screening/normal screening chiah kalpui a ni tawh ang," tih a ni.

Vanglaini palai zawhna chhángin Health minister Dr R Lalthangliana chuan, ramrî-ah bungraw phur lirthei enkawltute RAT hmanga endik kher loin a him theih tho tih ngaihdan a awm thu a sawi a, "Chutianga kalpui tumin order chhuah a ni a, mahse, kan zo dawn loa hriatna a awm avangin dan pangngaiin RAT hmanga lirthei enkawltute endik leh tur a ni," a ti.

Health Minister sawi danin, ngaihdan pakhatah chuan, ramri-ah bungraw phur lirthei enkawltute chu RAT-a endik loin, thermal scanner hmanga enfiah a nih chuan, lirtheite'n an tum hmun an pan zung zung thei dawn a, bungraw phur lirtheite chu vên (escort) a ni ang. Bungrua hlànthlaknaah pawh lirthei aṭanga chhuah loh tur a ni a, bungraw hlànthlak zawh veleh lêttir leh nghal tum a ni.

Hetih lai hian, Covid-19 Medical Operation Team chair­man Dr ZR Thiamsanga pawhin Vanglaini palai zawhna chhangin, state ramria RAT kalpui ṭhin chu tihtàwpna tur hriattirna chhuah ni tawh mah se, tih chhunzawm a nih tur thu a sawi.

Ramria RAT tihtawp chungchangah hian YMA Sub-Headquarters, Kolasib leh Vairengte Joint LTF & Joint YMA chuan nimin khan thuchhuah an nei nghal a, RAT tihtawp chu ṭha lo an tih thu an tarlang.

Kolasib Sub-Hqrs YMA chuan nimin khan Chief Secre­tary hnenah lehkha thawnin, Vairengte checkgate-ah RAT ti loa lirthei leh mihring kaltlangtir an remtih loh thu an ziak. "Dt. 4.9.2020 aṭang hian thu leh awm hma chu Sub-Hqrs YMA, Kolasib chuan Covid-19 leng laka Mizoram mipui kan him zel theih nan khawng takin a kalpui dawn a ni. Hei hian Mizoram state pawn aṭanga quarantine centre-a awm tur rawn kal mekte erawh chu a huam lo ang," an ti a; RAT chhunzawm a nih theih nan chak taka hma la turin an ngen a ni.

Vairengte Joint LTF & Joint YMA pawhin nimin khan thuchhuah siamin, Vairengtea RAT tih mek tihtawp tura tih a ni chu ṭha lo an tih tak zet thu an tarlang a, "RAT tihtawp hi kan duh lo. Mizoram sorkarin RAT tihtawp chungchanga thuchhuah a lo siam tawh hi a rang lama sût leh thuai tur leh a ngai anga RAT kalpui leh turin kan phût tlat a ni," an ti. 

Vairengte Joint LTF & Joint YMA chuan, Vairengtea RAT tih a nih chhungin Covid-19 vei mi 100 chuang hmuh chhuah a nih thu sawiin, "Hei hi sokar record-a a lan dan mai niin a lang a, hei aia tam daih hi sorkar record tel lo, hmun danga Covid-19 positive ni si, tlanbo ta mai an awm ṭeuh bawk," an ti a; RAT tihtawp a nih chuan, nasa takin Mizoramah truck driver-te'n Covid-19 an pu darh ngei dawn tih an tarlang.

Health secretary H Lalengmawia chuan September 3, 2020-a notification a tihchhuah sûtna notification a tichhuak leh nghal a; "Assam leh Tripura aṭanga Mizoram rawn luhna, Vairengte leh Kanhmuna truck driver leh handiman-te RAT tihtawpna tura he department-in notification No.D.33011/30/2020-HFW(nCOV)/13 dated 03.09.2020 a tihchhuah chu sût (cancel) a ni a, dan pangngai angin RAT hi kalpui leh tur a ni e," tih a ni.

Vairengte screening point-ah hian August 10, 2020 tlai aṭangin RAT hmangin Assam lam aṭanga Mizorama lut turte swab sample endik ṭan a ni a, nimin tlai dar 5 thleng khan mi 12,260-te sample endik tawh niin, Mizo 590 leh hnam dang 11,670 an ni.

Endik tawh aṭang hian Covid-19 vei mi 110 hmuh chhuah a ni tawh a, chu'ng zinga 108 chu hnam dang driver/handyman an ni a, pahnih chu Mizo niin, frontline worker - medical duty (health worker) leh Excise & Narcotics duty an ni.