Melriat VTF Chairman-in sorkar a kar Rál hmatáwnga awm hripui veite senso Mizoram sorkarin a tumsak vek dawn

Melriat Village Task Force (VTF) Chairman leh YMA President chuan Covid-19 a vei tih hmuh chhuah a ni a, State Referral Hospital (ZMC)-a dah luh an nih hnuah, task force member, hripui veite damdawi-ina an awmna bill chawi a ngai chu ṭha lo a tih thu a tichhuak. Chumi hnuah Mizoram sorkar chuan Covid-19 donaa thawktu, hripui veite enkawlna senso chu sorkarin a tumsak vek dawn thu a tichhuak ve nghal.

August 24, 2020-a Melriat khaw mi hripui vei hmuh chhuah mi 14 zingah Melriat VTF chairman Lalbiakthanga hi a tel a, August 25-ah SRH-ZMC ah dah luh an ni. August 26, Nilaini khan social media hrang hrangah Melriat VTF Chairman thu ziah nia lang - Covid-19 donaa nasa taka thawk village/local task force member, Covid-19 veite pawhin damdawi-ina an awmna bill an chawi a ngaih thu leh sorkarin hma la thei se a duh chungchang thehdarh a ni.

Melriat VTF Chairman thuziak thehdarh chu, "Task force member-te kan positive a, damdawi-in kan awmna bill kan chawi a ngai zui  erawh kan sorkar lam hian hma han la thei se. Kum tir aṭanga kan tha sên avanga kan chàn zozaite kha, tiang renga kan insenso a ngaih dawn chuan chhungkaw châwmtu leh innghahna tan chuan kan himna dapa rálbànsan tur hi kan tam viau ang a," tih a ni.

Hemi chungchangah hian Vanglaini palai zawhna chhangin Lalbiakthanga chuan, social media-a thu thehdarh chu ama tih ngei a nih thu a sawi a; damdawi-ina an awma an dinhmun tlangpui a sawi bakah, tunah hian Melriat VTF mi leh sa Covid-19 vei mi panga an awm mek thu a sawi bawk. 

Melriat YMA President hian August 26 zan khan lawmthu sawina a tichhuak leh bawk a; "Vawiin lama task force member Covid-19 positive inenkawlna bill chawi tur chung­changa sorkarin hma la se ka duh thu ka post chu min bialtu MLA Dr F Lalnunmawia'n lo hriain, chak takin hma a la nghal a. Bialtu MLA hmalakna avangin tunah hian task force member positive-te chu a bik taka ngaihtuah kan ni dawn a, a lawmawm hle a ni," a ti.

Aizawl South-III bialtu MLA-in a bial mi VTF duty zinga Covid-19 positive enkawl mekte chu senso ṭul apiang a tumsak vek dawn thu a ziak tel bawk. Hetih lai hian, Health department chuan August 26, Nilaini zan vêk khan, Covid-19 donaa ṭhahnemngai taka thawktute chungah an lawm a, chu'ng mite chu an ngaihthah dawn lo tih an tarlang a, "Covid-19 laka Mizoram kan him theih nana theihtawp chhuahtu frontline worker te, volunteer-te leh task force member zinga hri kai palhte chu an inenkawlna senso zawng zawng tumsak turin sorkarin thutlukna a siam tawh a. A kalphung tur rua­hmanna peih ṭêp a ni a, rei lo têah notification tihchhuah a ni ang," an ti.

Health & Family Welfare department thuchhuah chuan, Covid-19 donaa thawktute chu thlaphâng lo turin a ngen a; frontline worker zinga Covid-­19 veite enkawltu damdawi-inte pawh an inenkawlna senso ṭhíng lo turin hrilh an ni tawh tih a tarlang a ni.