A ruala vote chhiar an duh thu Cong-in SEC hnenah an thlen

Mizoram Pradesh Congress Committee (MPCC) chuan nimin khan State Election Commissioner (SEC) hnenah lehkha thawnin, nimina village council leh local council-a vote tlate chu la inthlan theih lohna khua leh venga mite inthlan hunah, a ruala chhiar turin an ngen.

Congress party chuan, India ramah Election Commission of India (ECI)-in Lok Sa­bha MP leh state legislative assembly inthlan hun (phase) hrang hrangin a buatsaih ṭhin tih sawiin, "Vote thlak tur mipuite’n ngaihtuahna fím tak hmanga duhthlanna felfai an siam theihna turin phase hrang hranga inthlan zawh a nih hma chuan ECI hian Sec.126A of Representation of People Act, 1951 hmangin exit poll leh opinion poll result tihchhuah a khap ṭhin a, vote tla result pawh a rualin an chhiar ṭhin. Hei hi inthlanna zalen, thianghlim, dik leh felfai a awm theihna atan a 

ṭangkai hle," an ti.

LC/VC inthlanah pawh inthlan hun inang lo a awm tâk thu tarlangin MPCC chuan, "Inthlan result hmasain nghawng a neih lohna turin la inthlang ve thei lo mipuite’n duhthlanna zalen, dik leh felfai tak an neih theihna turin VC/LC inthlan ṭhulhna veng leh khuate’n inthlanna an neih a, vote an thlak vek hma loh chu August 27, 2020-a inthlan result hi puang rih lo turin kan ngen che a ni," an ti. Inthlan result puan nghal a nih chuan la inthlan lohnaah mipui leh candidate-te tan inthlanna zalen leh dik a awm theih loh tur thu an tarlang.

MPCC chuan VC leh LC inthlanna turah electoral roll pahnih a awm tih tarlangin, "March 13,2020-ah draft roll tihchhuah a ni a, July 29, 2020-ah final roll tihchhuah leh a ni. Final roll hi nomination file leh scrutiny-na atan hman a ni a, chutah chuan Voter te thlalak pawh a chuang vek a ni. Mahse, he mi hnu August 22,2020-ah electoral roll hi nasa taka tih danglam a ni leh a, chutah chuan voter te thlalak a awm tawh lo. July 29 ,2020 a  E-Roll tihchhuah leh August 22,2020 a electoral roll tihchhuah serial number tam tak a inang ta lo a, mi tam takin harsatna an tawh phah," an ti.