Mipui rin ngam ni leh tura bul ṭanna atan Police-in ram pumah fitness parade an nei

Mizoram Police chuan mipui rin ngam ni leh tura bul ṭanna atan nimin zing khan 'Train to Excel' tih thupuia hmangin ram pumah fitness parade an nei. Aizawlah chuan 1st MAP Playground-ah hun hman a ni a; khuallian Home minister K Sapdanga chuan, ruihhlo ti ṭhin police lakah khauh zawka kal a ngai ta nia a lan thu a sawi.

1st MAP Playground-a fitness parade-ah hian police constable aṭanga IGP thlengin mi eng emaw zat minute 45 chhung an parade a, Aizawl páwna police awmte pawhin an remchan dan angin hun an hmang. Fitness parade hi police-te'n rilru leh taksa hrisel zawk an neih theihna tura hmalak bul ṭanna a ni a, kawng hrang hrangin hmalak zui a ni ang.

Home Minister chuan, January 1 - August 3, 2024 chhungin police 77 an thi tih sawiin, "Kan insùn chhan tam tak chu ruihhlo leh a kaihhnawih natna vang a ni. India ram state ṭhenkhatah chuan ruihhlo laka insûm thei lo chu police hna thawk tlak loah an ngai a, keini pawh khauh zawka kan kal ve a ngai ta niin a lang," a ti.

Kumin favângah Police Sports Meet neih a ni dawn tih sawiin Sapdanga chuan, "Inelna ni pahin fitness tihpunna tur a ni a, a tam thei ang ber an tel theihna tur kan hotute'n an ngaihtuah ang. Infiammite hi police-ah pawh an ṭangkai hle a ni," a ti a; police lâk rûnpui a awm leh hunah pawh infiammite'n mit an lak viau tur thu a sawi.

Home Minister chuan, arm drill leh firing lam uar thar leh a ṭul thu a sawi a, "Kan armed staff zawng zawngte hi commando standard nei vek turin siam kan tum ang," a ti.

Police-ah 'pu chuam' neih âwih a nih tawh loh thu sawiin K Sapdanga chuan, "Tu lak pawh ni ila sipaiah chuan kan pute chu kan chunga mite an ni. Páwn lamah pu nei tlata inhriate chu sipaia ṭang reng tlak an ni lo. Lal dan indawt kan ngai pawimawh hle ang," a ti a, zualko chíngte thlavâng an hauh dawn loh thu a sawi.

Home Minister chuan, police lakna (recruitment)-ah te, kai sanna (promotional process)-ah te, awmna hmun sîksawi (transfer and posting)-ahte dan bawhchhiatna emaw, induhsakna uchuak emaw a awm a nih chuan eng level-ah pawh an ngaihzam dawn loh thu police kal khawmte a hrilh.

Police department-ah sanction post chu 12,228 a awm thu sawiin K Sapdanga chuan, "Tuna kan dinhmun chu post luah 7,781 leh post ruak 4,447 a ni a, kan indaih lo viauin a lang. Kan indaih loh chhan hi thawktu tlem vang a ni em? Kan inrem fuh loh vang a ni em? Awmna hmun tur ni loa awm kan tam vang a ni em? Hmun luah ve tlat si, hna thawka chhawr tlak si loh kan lo tam viau a ni thei em? Uluk takin chhui a ni ang. Indaih turin a ṭul anga hmalak kan tum dawn nia," a ti.

K Sapdanga chuan, police-te hnathawh hun chu ni khatah darkar 24 chhung a nih thu sawiin, "Chuvangin, hamṭhatna kawngah pawh duat bik an ni. Police officer nih leh pisa kal tlaite a inhmeh lo bik. Office hun vawn dik kawngah sorkar hna thawk dangte entawn turin an awm tur a ni," a ti a; special treatment dawng ve lote an thîk a rem lo a, an thîk tura an awm pawh a rem loh thu a sawi.

Home Minister sawi danin, police arm branch-a batallion-te'n parade leh physical training neih chunzawm tur a ni a, an routine pangngai - Thawhṭanni zingah Commandant Inspection Parade te, Nilaini zingah Commandant Physical Training Parade, Zirtawp zingah Adjutant Parade-te regular taka chhunzawm tura beisei an ni.

Director general of police (DGP) Anil Shukla pawhin thu sawiin, "Vawiina kan hun hman hi Home Minister-in a ngaih pawimawh em em police-te hriselna tura hmalakna pawimawh a ni. Tun hnai kum 5 kal ta chhungin chawhrualin kum tin chhan hrang hrang vangin police 126 an thi ziah ang a ni," a ti a; thihna tam zawk thlentu laka fihlim thei turin ṭan lak a ngaih thu a sawi.