2024-ah Mizorama chhiatna thlengah mi 42 an thi tawh, in 5,938 a chhia

Mizoram State Disaster Management Authority (SDMA) chu nimin khan an chairman Lalduhoma, chief minister hoin CM Conference Hall-ah an ṭhukhawm a; kumin 2024-ah chhiatna thleng avangin mi 42 an thih tawh thu an tarlang.

Ṭhutkhawmah hian SDMA sum dinhmun te, inkaihhruaina anga sum pek chhuah ṭhin a nih dante sawi a ni a; sorkarin report a dawn chinah kumin March aṭanga May thla chhungin leilung chhiatna avangin in 5,938 a chhia a, mi 42 an thi tawh a ni.

Disaster Management & Rehabilitation (DMR) department-in Mizoram hmun parukah lirnghing tehna khâwl (seismic observatory) an dah tawh thu te, mihring chen tamna hmuna leimin thleng nasa ṭhin tihnêpna atana tui luankawr leh thli paih dan mumal zawk zirtu tur study team din a nih thu tarlan a ni bawk.

Chhiatna thlenga chhan­chhuahna hmanrua leh leilung zirna tur hman­rua eng emaw zat lei an rêl a; Hlimen leh Melthuma leiminin in a tihchhiatsak chhungkaw 41-te chen lailâwkna tur siam a nih thu an sawi.

African Swine Fever vanga harsatna tâwk chhung­kuate ṭanpui dan tur an ngaihtuah a, mumal zawka chhawmdawlna an hmuh theih nan rua­hmanna siam an rêl.

CM Lalduhoma chuan, Cyclone Remal vanga chhiatna endiktu sorkar laipuia Inter Ministerial Team-in report an thehluh tawh thu leh Union Finance Ministry-ah a awm mek thu a sawi a, "Ṭanpuina eng emaw zat min rawn pek kan beisei," a ti.

Ṭhukhawmah hian DMR minister K Sapdanga, PWD minister Vanlalhlana, AH&Vety minister C Lalsawivunga, Health minister Lalrinpuii, PHE minister Prof. Lalnilawma, FCSCA minister B Lalchhanzova, chief secretary Dr. Renu Sharma, DMR secretary K Lalrinzuali leh member dangte an tel a ni.