Champhaiah zirtirtu dah belh phûtin sorkar pisa leh sikul kai tur an dang; Sorkarin Champhai College a duhsak - Minister

MZP Headquarters, Champhai chuan Champhai College-ah zirtirtu dah belh phûtin nimin khan Champhai khawpuia damdawi-in OPD leh bank tih loh sorkar pisa leh sikul zawng zawng an dang. Higher & Technical Education (HTE) minister Dr Vanlalthlana chuan, Champhai College chu Mizoram sorkar college zinga zirtirtu ngah ber dawttu a nih thu sawiin, sorkarin a duhsak thu a sawi.

Champhai MZP hruaitute hnen aṭanga Vanglaini thu dawn danin, Champhai College-a zirtirtu dah belh phûtna atana August 2, 2024-a college zirtirtute leh zirlaite an dan hnuah pawh an beisei ang thu lawmawm an hmuh loh avangin pisa leh sikul kai turte hi an dang a ni. Sorkar aṭanga an beisei ang thu lawmawm an hmuh loh avangin vawiinah an dang leh dawn.

Champhai College-ah hian zirtirtu 61 an awm mek a; zirtirtu dah belh phûta hmalaknaah hian MZP-te chuan nimin zing dar 8 vel khan sikul leh pisa hrang hrang an véng a, pisa leh sikul kai tur dan buai ngai an awm lo. Zirlai ṭhenkhat erawh chu sikul an kal hman a, mahse, hawtir leh an ni.

MZP-te'n pisa leh sikul kai tur an dan chungchangah hian HTE minister Dr Vanlalthlana chuan nimin khan a pisaah thuthar thehdarhtute a kâwm a, "Champhai khaw chhunga zirna-in leh sorkar pisa zawng zawnga kai tur danga Champhai MZP-in hma an la zui zel hi a pawi tak zet a ni," a ti a, zirna leh sorkar hna tikhaihlak zawnga hmalak a ni chu pawi a tih thu a sawi.

Dr Vanlalthlana chuan, Champhai College chu sorkarin a duhsak tih sawiin, "RUSA-1, RUSA-2 leh PM-USHA aṭanga thuam ṭhat mek a ni a, zirtirtu dah belh chungchangah a hrana post siam belhna tur thutlukna pawh siam a ni tawh. Mizoram puma college zirtirtute khairual zawka kalpui a nih tur thu leh fimkhur takin sorkarin hma a lak mek thu Champhai MZP-te hrilh an ni," a ti.

HTE Minister sawi danin, zirtirtu indaih lohna avanga harsatna chu Mizoram sorkar hnuaia college zawng zawngin an tawk mek vek a, chuvang chuan zirtirtu sem rual turin buaipui mek a ni. College pakhat tana a bika transfer lo tih chuan an zirchianna a tibuai theiah ngaih a ni.

Champhai College-ah hian arts, science, commerce leh bachelor of computer application (BCA) course kalpui mek a ni a, Mizoram sorkar college zingah stream pali nei awmchhun a ni. Commerce leh BCA erawh self-finance mode-a kalpui a ni thung. Zirtirtu (regular teacher) 27, contract assistant professor 7, RUSA assistant professor 4, part time assistant professor 10 leh casual teaching faculty 13 an awm mek a; an vaiin zirtirtu 61 an awm mek.

Mizoramah state sorkar din college (general stream) 20 a awm mek a, chung zingah chuan zirtirtu sanction post aawm zat ṭanga tehin Champhai College hi zirtirtu ngah ber dawttu a ni.

HTE Minister chuan, Champhai MZP chu an hmalakna chhunzawm lo tur leh sorkarin zirtirtu sem rual a tum mek chu lo ngaichâng hram turin a ngen a ni.