OMSS-D kaltlanga buhfai lei kalpui dawn

Food Corporation of India (FCI) Divisional Office, Aizawla divisional manager Zodinpuii Ralte chuan nimin khan a pisaah thuthar thehdarhtute a kâwm a; August 7, 2024 aṭangin FCI-in mimal leh pawl tan Open Market Sale Scheme-Domestic (OMSS-D) kaltlangin buhfai lei theihna a kalpui dawn thu a puang.

Zodinpuii Ralte chuan, OMSS-D kaltlanga lei tur buhfai chu fortified rice vek a nih thu sawiin, "Reserved price chu quintal khat Rs 2,873 a ni a, M-Junction portal-a inziak lut tan chawlhkar tin Nilainiah e-auction neih ṭhin a ni ang," a ti a; e-auction chháng duh tan a tlem berah metric ton 1 leh a tam berah metric ton 2,000 chin a theih tih a sawi.

FCI Division Manager sawi danin, OMSS-D hi March 31, 2025 thleng kalpui turin offer an dawng a, buhfai chuang (surplus stock) azirin chawlhkar tin FCI kudam pali - Bairabi, Bualpui, Kolasib leh Aizawl aṭangin metric ton 500 zel bidding offer a awm dawn. E-auction veka tih a ni dawn a, reserved price bakah kudam awmna hmun hlat zawng azirin buhfai man a sang dawn a, e-auction chhang tur tan GST registration neih a ngai.

OMSS-D kaltlanga lei tur chungchang hre chiang duh tan M/s MJunction Services Ltd. helpdesk no. 1800 102 7136 emaw, website https://www.valuejunction.in/f... ah emaw zawhfiah theih a ni.