KHAWTHLIR

Teachers’ Day

State Working Committee for Teachers’ Day chu nimin khan an chairman Dr Vanlalthlana, Education minister minister hoin an ṭhukhawm a, kumina Teachers’ Day hman dan tur leh zirtirtute kaihhnawih thil pawimawh an sawiho. Kumina Zirtirtute Ni puala Mizoram puma hmalakna tur ruahmante sawihoa pawm a ni.

Target 98.80% tlin

Lunglei District Level Coordination Committee for National Deworming Day (NDD) chu an chairman R Lalṭhazuala, bawrhsap hoin nimin khan an ṭhukhawm a; kumina NDD thawh khatnaah Lunglei leh Hnahthial district-a kum 1-19 inkar rúlhût hlo pek tum zinga 98.80% hnenah pek a nih thu tarlan a ni. NDD thawh hnihnaah Lunglei leh Hnahthial district-a kum 1-19 inkar mi 60,532 hnenah rúlhût hlo pek tum a ni.

Hmanrua sem

FOCUS, DMU-Khawzawl chuan nimin khan an pisaah an hnuaia loneitu hmeichhiate tan hmanrua an sem a, Khawzawl DC K Vanlalṭhiana'n a hmanpui. FOCUS, DMU-Khawzawl hi kum 2021 khan bul ṭan niin, loneitute thlai thar leh sum lak luh lamah hmasawnna a awm theih nan Rs 9,94,87,620 hu hmalak an nei tawh a; chhungkaw 2,000 chuangin chhawmdawlna an dawng tawh a ni.

Lirthei pe

BRN Infrastructures Private Limited leh National Highways & Infrastructure Development Corporation Limited chuan nimin khan YMA Sub-Headquarters, Lunglei hnenah corporate social responsibility kaltlangin Mahindra Bolero Camper 4x4 an pe. Lirthei hi Rs 10,50,601 man a ni a, Lunglei bawrhsap R Lalṭhazuala'n YMA Sub-Hqrs hruaitute hnenah a hlan a ni.

Ruihhlo man

Siahaa awm 20th Assam Rifles sipaite chuan nimin zing khan Siahaah Malsawmkimi (38) w/o John Elias, Siaha New Colony hnen aṭangin heroin (no.4) gram 258.76 leh VT Thatipha (28), Siaha Vaihpi-III hnen aṭangin ganja gram 476.40 an man a, Excise & Narcotics hnenah an hlan. Ruihhlo an man hi tualchhunga hralhna ang chuan cheng vbc. 1.833 vel hùa chhût a ni.