International Clouded Leopard Day hmang

Mizoram University Zoolo-gical department huaihawtin nimin khan MZU Department of Education conference hall-ah International Clouded Leopard Day (Kelrál Ni) hman a ni a, Governor Dr Hari Babu Kambhampati-a'n a hmanpui.

International Clouded Leopard Day hi August 4 a ni a, kuminah Pathianni a nih avangin nimin khan hman niin, thupui chu 'Protect the elusive' tih a ni. Day hmanna hi Society for the Preservation of Endangered Carnivores and their International Ecological Study leh Riahrun Tours bultum a ni.

Governor chuan, clouded leopard (kèlrál) chu ramsa váng tak a nih thu sawiin, "Mizoramin kêlrál kan la neih hi kan vannei hle. Mizorama kan ramsa váng tak leh mang mai thei dinhmuna ding mekte leh an chenna ramngaw humhalhna leh ven hi Mizoram mipui mawhphurhna a ni," a ti a, ramngaw leh ramsate humhalh tlat turin mipui a sáwm.

Kelrál Ni chuan Mizote rilruah Mizorama ramsa leh nungcha hrang hrang mang mai hlauhawmte hlutzia leh humhalh a ṭulzia tuh se a duh thu sawiin Larsap chuan, "An chenna ramngaw pawh tichereu mai loa duat taka enkawl a, humhalh tlat tur kan nihzia a tharin min hriat nawntir leh rawh se," a ti.

Dr Hari Babu Kambhampati chuan, ramngaw, lui leh nungcha dangte humhalhnana lama thawktu zawng zawng hnenah lawmthu a sawi a; thâ thlah loa ramsa leh ramngawte humhalh zel turin Mizoram mipui a ngen.

Governor hian 'Conservation of Clouded Leopard in Mizoram' tih thupui hmanga Online Slogan Writing Competition (auhla inphuahsiak)-a ti ṭhate hnenah lawmman a hlan a ni.

International Clouded Leopard Day hmannaah hian Mizoram PCCF, MZU Vice Chancellor, School of Life sciences Dean leh MZU Zoology department HoD ten thu an sawi bawk.