Chinland Government leh CNO inremna zawngin ZORO-in hruaitute an kâwm

Zo Re-Unification Organisation (ZORO) chuan Myanmar-a Zo hnahthlakte zingah inremna a awm theihna tura hma an lakna kal zelah nimin khan Chinland Government hruaitute Aizawla ZORO pisaah an kâwm.

Inkawmhona hi ZORO president R Sangkawia'n a kaihruai a, Chinland Government aṭangin chief minister Pathanga leh hruaitu dangte an tel.

ZORO thuchhuah chuan, Myanmar rama Chin state-ah Chinland Government/Chinland Council leh Chinland Brotherhood/Chin National Organisation (CNO)-te an inhmu thiam lo a, silai an lek hial tih sawiin, "Hei hi ZORO chuan ṭha ti loin pawi a ti hle. Unau vek kan ni a, in hmu thiam lo tur kan ni lo a, inlungrual taka awm tur kan nih avangin an inkarah remna palai hna kan thawk mek a ni," a ti.

Inkawmhonaah hian ZORO hruaitute chuan, unau an ni a, indo thei pawh an ni lo tihah chian tlan a ngaih thu te, unau, thlah khat an nih angin Pathianin engtikah emaw chuan Zo fate a la suih khawm ngei an rin thu te, unau indo a ṭha lo a, an inrem a ngaih thute an sawi.

Chinland Government/Chinland Council hruaitute pawhin inremna tura ZORO-in hma an la chu ṭha an tih thu sawiin, "Keini Chinland Government/Chinland Council chuan kan unaute nen inbiak kan duh reng a, engtik lai pawhin dawhkan kîla inbiakna awm se kan duh dan a ni. U leh nau inkah hi ṭha kan ti lo a, kan duh lo. Unau kan ni a, inngeih tlang taka awm hi kan duh dan a ni," an ti.

ZORO thuchhuah chuan, Chinland Government/Chinland Council leh Chinland Brotherhood/Chin National Organisation te chu an inrem theih nan hma an lak zel dawn thu leh hun remchang hmasa berah dawhkan kilpuia inbiakna huaihawt an tum thu a tarlang.