Eiruk loh kan intiam a, vawiin thlengin kan fihlim - Lalvenchhunga

Adviser to chief minister TBC Lalvenchhunga, MLA chuan nimin khan ZPM party pisaa inkhawmah thu sawiin, eiruk loh an intiam angin tun thlengin ZPM MLA-te chu eirukna lakah an fihlim thu leh, eptu party mite'n CM huaisenzia leh minister-te thawhrimzia sawi nuam an tih thu a sawi.

TBC Lalvenchhunga chuan, ZPM sorkarin budget vawi khat an pharh ve tawh tih sawiin, "He budget hmang chho mektu mipui phun thâwm kan la hre lo leh fakna thâwm hi ngaihthlak a nuam tak zet. CM huaisenzia leh minister-te thawhrimzia sawi nuam titu chu opposition-te an ni," a ti.

ZPM-in sorkarna an chan chiah khan mipui beiseina chanve tihhlawhtlin a nia a hriat thu sawiin Lalvenchhunga chuan, "CM huaisen kan nei a, opposition-te pawhin sawi nuam an ti. Minister-te inpekna leh thawhrimzia hretute chu mipui kan ni. Eiruk loh kan intiam a, vawiin thlengin kan fihlim," a ti a; an thusawite chu an khingpuite'n lâk kawih an thiam hle niin a sawi.

Adviser to CM chuan, dâwm kân ngai dâwm kâng lo a, a kâng sate nen hnung thak inhiah tawn hun a liam tawh tih sawiin, "Tunah chuan kan ṭan tlàn a, kan dik tlàn a, a ṭha zawnga kan innawr tawn a ngai. Kalphung thar siam tur hian hna hautak thawh a ngai a, dikna a lal dawn chuan minister-te an dik hmasak a ngai a, mipuite'n kan thlâwp a ngai bawk. Contract leh supply system fel lo lutukte kha a tuartu chu mipui kan ni a, tunah chuan dik leh felfai zawka kal kan tum dawn a ni," a ti.

TBC Lalvenchhunga chuan, fimkhur leh uluk, dik zawka kal a ngaih thu sawiin, hnathawh tur thawk zo si loa kalsan a tam avangin project tharin a tawrh phah mek thu a sawi a; Dan hnuaiah dik taka kal theih a nih thu sawiin, "Dik lo min tihtir tumte'n min huat hi kan pawisa dawn lo a, kan thil neih leh lak luh aṭangin kan eiruk leh eiruk loh chu a chiang mai dawn," a ti a; MLA a nih hnuah scooter loan a lâk bâk thil thar a la neih loh thu leh dik duh chunga ṭhahnemngaih a nih chuan eiruknain hmun a chan theih loh thu a sawi bawk.