ZPM sorkar hi beisei leh rin ang a ni lo - R Lalzirliana

MNF adviser R Lalzirliana chuan nimin khan Mizo Hnam Rûna inkhawmah thu sawiin, ZPM kaihhruai sorkar chu ZPM party mite leh party awmna nei lo (neutral)-te beisei leh rin ang a ni lo niin a sawi.

R Lalzirliana chuan, ZPM party chu inthlan campaign laiin sorkar hmasate zawng zawng aia chungnung turin an insawi niin a sawi a, "Politics field la dai ngai lote'n kan ram hi hruai chhin se tih duhna a len avangin ram tana mi tling leh tlâk tak takte pawh an tla zo rih a ni. ZPM sorkar hi anmahni party bakah anmahni thlang tlingtu neutral pawhin an beisei leh rin ang a ni lo," a ti.

Tuna chief minister Lalduhoma'n Kawnpuia thu a sawiah CM-in portfolio a neih loh tur thu sawi nia sawiin R Lalzirliana chuan, "Minister chak lo deuhte a dâwm kân tur thu a sawi a, a ri chu a mawi khawp mai. Mahse, a hnuah ZONET interview-naah CM-in portfolio neih loh a theih loh thu sawi lehin, tunah department pawimawh tak tak paruk vel a enkawl leh si," a ti a; CM-in a enkawl Finance department chu a duhsak zawngte voh bik theih nan a inpe niin a sawi.

MNF Adviser chuan, ZPM chu an sorkar hma aṭangin an sorkar chuan CBI general consent pek tiamah puhin, "An sorkar ta cheng a, CBI chhuitir tur chuan state sorkar phalna order a ngaih thu an chhuah leh si a, CBI chu an tana mi chimawm deuhte chauh chhuitir nan an hmang leh dawn si a ni," a ti.

R Lalzirliana chuan, Home Minister-in dan loa thil phurhte thla khat chhunga an tihtawp tur thu a sawi laiin, tun thlengin langsar takin kuhva phurh tihtawp a la nih loh thu a sawi a; Vairengte leh Bilkhawthlir tlangdunga kuhva chíngtute an la buai nasat thu leh kudama kuhva an man sa a dah bo thu a sawi bawk.