Airport zir chiangtute'n report sawifiah

Mizoram sorkarin Lengpui Airport mi dang hnena hlan leh hlan loh chungchanga rawtna siam tura a din Working Committee to Look into the Maintenance and Management of Lengpui Airport chuan nimin khan chief minister Lalduhoma hnenah report an thehlut a, an sawifiah nghal.

Chief Minister chuan, hun tiam chhunga report felfai tak an peih chu lawmawm a tih thu sawiin, "In report aṭang hian in thawh rimzia chiang takin a lang," a ti a; Working Committee on Lengpui Airport member-te lawmthu a hrilh.

Committee chairman TBC Lalvenchhunga, MLA chuan, "Sorkarin hun tiam min pek chhungin Committee hian report kan peih hman a, a thehluh erawh chu vawiinah kan ruahman a ni," a ti.

Committee member secretary Vanlaldina Fanai, GAD secretary chuan, "Committee hian Lengpui Airport enkawl zel dan turah thutlukna a siam lo a, thutlukna chu Council of Ministers kuta awm a ni," a ti a; Committee-in an zirchianna chu a theih anga chipchiarin an tih thu a sawi.

Report sawifiahnaah hian Committee member Lalrohlua, Aviation director-in report-a an tarlante a lem nen a sawifiah a ni.