Mizoram tana sum hai luh hi sorkar lai mawhphurhna a ni - BJP President

BJP, Mizoram Pradesh president Vanlalhmuaka chuan, sorkar laipui budget thara sum awmte Mizoram tana hai luha hmasawnna atana hman chungchang chu state-a sorkar lai mawhphurhna a nih thu a sawi.

Vanlalhmuaka hian nimin khan an party pisaa political session-ah thu sawiin, union budget tharah hmarchhakte tan cheng vaibelchhe nuai tél dah a nih thu a sawi a, "Loneitute hamṭhatna leh mi retheite dinchhuahna tur a tam hle. Hmarchhak tana Central-in budget a dah hi a tam hle a, he budget aṭang hian Mizoram hian eng zat nge kan hai luh ve ang a, Mizoram hmasawnna turin engtin nge hma kan lak ang tih chu sorkar lai mawhphurhna a ni," a ti.

Mizoram BJP President chuan, BJP-in India ram pum hmasawnna tur a ngaihtuah avangin Viksit Bharat (Developed India) 2047 thlirin hma a lak thu sawiin, "Khawvelah ram changkang, ram intodelh leh hausa ber nih tumin India zalenna kum 100 lawmna hun pualin hma a la a ni," a ti. India zalenna champha a thleng dawn hnai tih sawiin, Independence Day pualin India rama chhung tinte an inah hnam puanzar zar tura ngen an nih angin Mizoram mipui pawh hnam puanzar zar turin a ngen a ni.