Covid-19: Mizoram dinhmun Hripui vei mi 8 hmuh belh
September 3, Ningani khan Mizoramah Covid-19 vei mi paruk hmuh chhuah a ni a, nimin khan mi pahnih hmuh belh leh a ni bawk. Nimin khan hripui vei dam tawh mi 11 chhuahtir a ni a, hripui vei hmuh chhuah tawh mi 1,048 zinga 669 an chhuak tawh.
Mizoramah Covid-19 vei mi 1,048 hmuh chhuah a ni tawh a, chu'ng zinga mi 681 (64.98%) chu chhuak tawhin, mi 367 (35.02%) an la chhuak lo. La chhuak lo zingah hripui vei tawh lo eng emaw zat an awm bawk.
Ningania Covid-19 vei hmuh chhuahte chu - ZMC laboratory-a hmuh chhuah pali leh Vairengte checkgate screening point-a Rapid Antigen Test hmanga mi 478-te swab sample endik aṭanga hmuh chhuah hnam dang driver/handyman pahnih an ni a; nimin chhun lama hmuh chhuah mi pahnih pawh Vairengtea hmuh chhuah hnam dang an ni.
September 3 khan ZMC laboratory-ah RT-PCR hmangin sample 595 endik a ni. Sample 595 zinga Covid-19 vei hmuh thar palite chu state páwn lam mi, mipa kum 25-44 inkar an ni a, quarantine centre-a awm lai vek niin, civil mi pahnih leh sipai pahnih an ni.
Nimin khan Covid-19 vei dam tawh mi 11 chhuahtir an ni a, civil mi pali leh sipai mi leh sa pasarih an ni. State Referral Hospital aṭangin mi pathum (civil mi pahnih leh Assam Rifles pakhat), Serchhip Nursing School CCC aṭangin BSF pahnih, Serchhip DCHC aṭangin civil mi pakhat leh Zobawk CCC aṭangin mi panga (BSF pali leh civil pakhat) an ni.