MNF-in total bandh an huaihawt Buaina leh harsatna lian a thleng lo

MNF party chuan nimin khan Mizoram pumah darkar 12 chhung awh turin 'Mipui thlavang hauhna total bandh' an huaihawt a, buaina leh harsatna lian tham thleng hriat a ni lo. MNF senior vice president Tawnluia chuan, bandh an neih chhan an thil phût a hlawhtlin hma chuan nawr zel an tum thu a sawi.

MNF total bandh hi zing dar 5-ah ṭan a ni a, tlai dar 5 thlenga neih tura ruahman ni mah se, chawhnu dar 3:30-ah an sût a ni. Bandh avang hian dawr inhawng a awm lo a, pisa leh zirna in zawng zawng khar a ni a; buaina lian tham thleng hriat a ni lo.

MNF senior vice president leh Action Committee chairman Tawnluia chuan nimin chawhnu dar 3 khan Mizo Hnam Runah press conference a nei a; total bandh chu Aizawl bakah, district khawpui tin, SDO ṭhuthmun khaw hrang hrang leh khaw dang ṭhenkhatahte neih a nih thu a sawi.

Tawnluia chuan, an bandh huai­hawt chu mipuiin an thlawp ṭha nia sawiin, lawmawm an tih thu a sawi a, "Kan total bandh hi a hlawhtling a, kan thil phûtte a hlawhtlinna tur chu sorkar kutah a innghat. Chhiah tihsan hi kan do a ni lo a, mipui ban phak tawka tihsak kan pawm a, vawi leh khata sang lutuka an ti hi kan duh lo a ni. Kan phûtte an tihlawhtling lo a nih chuan hma kan la zel dawn," a ti.

MNF thil phûtte chu khawlaia poster târ leh kawngzawhte hmangin an lantir a, sût turin leh sorkar an lo phût tawh tih sawiin, Tawnluia chuan, Governor hnena pawh memorandum an thehlut tawh a, mahse ngaihsak a hlawh lo niin a sawi a; 'Mipui thlavang hauhna total bandh' an huaihawt chu mipui hma ngaih vangin leh mipuite hamṭhatna zawk duh vang a nih thu a sawi.

Sorkarin biak-in leh thlanmual aṭanga chhiah a ît tel chu vanduaithlak an tih thu sawiin, Tawnluia chuan, "Biak-in leh thlanmual aṭanga chhiah lâk hi suspend ringawt loin, cancel turin kan phût a ni," a ti.

MNF senior vice president chuan, MNF a sorkar hunah chuan biak-in leh thlanmual aṭanga chhiah lak chu an tihtawp nghal tur thu te, thisen sawngbawlna man unit khata Rs. 550 lak chu an tihtawp nghal tur thu te, buhfai man, tui leh electric bil, vehicle lifetime tax leh zu zawrh theihna dante chu an ennawn tur thu a sawi.

Sorkar hnathawkte hlawh ṭha taka pe tur te, GP fund leh MR bill an hrênsak chu pe chhuak thuai tur te, PMGSY sum cheng vbc. 54.74 hun rei tak an hrênsak tawh chu contractor-te hnenah pe chhuak thuai turtein an phût tih a sawi a; ram himna ngai pawimawh tur leh police-te hmang ṭangkai turin an phût tih a sawi bawk.

Tawnluia chuan, bandh an siam vanga harsatna tâwkte hriatthiamna a ngen rualin, bandh chu mipuite hmakhawngaih vang liau liau a nih thu a sawi a, mipuite ṭawiawmnaah lawmthu a sawi.

Zawhna chhangin Tawnluia chuan, an thil phutte sorkarin a tihhlawhtlin loha an kal zel dan tur chu MNF Action Committee-in an la ngaihtuah tur thu a sawi a ni.

Total bandh hi Mizoram khaw lian zualah chuan neih deuh vek ni mah se, CADC chhungah chuan V/C inthlan avangin neih a ni lo. Khaw ṭhenkhatah chuan chawhnu dar 2 vela bandh titawp an awm. Lawngtlai district-ah pawh Central YLA-in total bandh an neih mek avangin a hranpain MNF-in an buaipui lo a ni.

MNF thil phûtte:

• Leiman leh Zoram chhiah tihhniam.

• Buhfai man tihsan tawh tihhniam leh.

• Tui leh kawlphetha hman man tih­hniam.

• Thisen sawngbawlna man lâk titawp.