MNF duty-naah Assam police an inrawlh

Nimina MNF total bandh-ah Vairengtea MNF-te chu an khaw dai, Assam ram lama auto-rickshaw stand-ah hrui pawtin an duty a; chu chu ngaimawhin Assam police-te an inrawlh a, Mizoram police-te an kal ve nghal bawk. Buaina lian erawh a chhuak zui lo.

Vairengte police-te aṭanga thu dawn danin, auto-rickshaw stand-a MNF duty-te'n zing lamah Assam Forest mi pakhat, an duty-na hmun paltlang tumtu chu lo dangin, Assam lamah an lettir leh a ni. MNF-te duty-na hmunah hian Mizoram police constable pahnih an awm ve bawk.

Chawhma dar 11 velah MNF-te duty-naah chuan Assam police 10 vel kalin, MNF duty-te chu haw darh turin an ti a, mahse MNF duty-te chu an kal sawn duh bik lo. Assam police-te an kal avang hian Vai­rengte Police Station-a duty police-te chu SDPO Remlalliana Hnamte hoin an chhukthla ve nghal a; an inbiak hnuah Assam police-te chu an lêt leh a, Vairengte SDPO pawh khaw chhung lamah a let leh a ni.

Assam lam chu Dholai OC hoin police ṭhahnem tak, magistrate leh Forest RO-te nen chawhnu dar 3 rîk dawn hnaiah an thawk ṭha leh a, police-te chuan ralthuam - silai leh tear gas-te an keng a ni. Assam police-te rip zawkin an thawk chhuak ṭha leh tih hriain, Vairengte SDPO Remlalliana leh Vairengte SDO JH Rimawia te chu an chhuk ve leh nghal a ni.

Chawhnu dar 3:30-ah bandh tihtawp a nih avangin MNF bandh duty-te pawh an ṭîn a; Vairengte SDO leh SDPO-te'n kir tura an ngen angin, buaina lian zawk chhuak loin Assam lam mite chu an lêt a, Mizoram police-te pawh Vairengte khaw chhungah an haw ve nghal a ni.