KHAWTHLIR

Kum 40-na lawm dawn
MHIP chuan vawiin hian MHIP kum 40-na, Ruby Jubilee an lawm dawn. MHIP jubilee lawmna pui ber, Lammuala neih turah Mizo hmeichhia a tam thei ang ber tel turin an sáwm. Lammuala MHIP jubilee lawmna hi chawhma dar 10-ah ṭan a ni dawn a, MHIP gen.hqrs. president Lalthlamuani'n a kaihruai ang a, chief minister Lal Thanhawla khuallian ani ang. MHIP gen.hqrs. chuan, MHIP ruby jubilee lawmnaa turte chu mahni branch MHIP flag ken tur a ni.

Dinhmun tha lo
Maraland Democratic Front (MDF) president M Laikaw chuan Thawhlehni khan Saihaah thuthar thehdarh­tute kâwmin, MADC sum dinhmun siam ṭha tura ṭan lak thuai a nih loh chuan buaina lian zawk­ah an lut thuai dawn niin a sawi. M Laikaw chuan, tuna MADC sum indaih lohna chu Rs. 26,31,14,000 a tlin thu te, kum 2011-12 tâwp lam aṭang MADC sorkarin a hnathawktute hlawh an pek ṭhat theih loh thu te, January-March 2015 chhunga hlawh tur sum an neih zat chu Rs. 27,43,000 chiah a nih thute a sawi bawk.

Jubilee lawm
BCM Emmanuel Kohhran, Mamit Vengthar chuan nimin khan an kum 25-na, silver jubilee an lawm a, kohhran mipuiin tlaiah ruai an ṭheh a ni.

IFS kaisang
Aizawl district forest officer (DFO) V Lalfala, IFS (2001 AMGUT cadre) chu conservator-ah a kaisang a, Mizoramah a awm zui ang.

Library hawng
Minister PC Lalthanliana chuan nimin khan Zawngin branch YMA Library a hawng. PC Lalthanliana hian Zawngin khuaa Kawrlungtuk an tih, lung ker kuaka tuikhur siam leh Puma Zai chhuah ṭanna lungpuite a en bawk.