CADC-ah V/C inthlan neih a ni

State Election Com­mission (SEC) buatsaihin nimin khan Chakma Autonomous District Council (CADC) huam chhunga village council 71-ah inthlan a ni a, buaina leh harsatna awm loin tluang taka neih a ni.

CADC V/C inthlan hi V/C 81-ah neih tura ruahman ni mah se, V/C 10-ah chuan INC candidate-te khingtu an awm loh vanga tlinga puan an nih avangin, V/C 71-ah vote thlak a ni.

SEC hotute chuan, CADC V/C inthlanah hian harsatna leh buaina thleng a awm an hriat loh thu Vanglaini an hrilh. Vote thlak hun hi zing dar 7 aṭanga tlai dar 4 thleng a ni a, vote thlak zawhah vote chhiar nghal a ni.

Chuhtu dang awm loh vanga INC candidate-te tlinga puannate chu - Palenasora, Bora­ka­ba­khali-II, Simi­niasora, New Jognasury I, Dursora, Fulsora, Boraituli, New Jognasury III, Boraguisury leh Bandukbanga te an ni.

CADC hnuaia V/C 81-ah hian seat 481 a awm a, candidate 923 an awm. Candidate zinga 767 chu general seat chuhtu an ni a, 156 chu hmeichhe tana seat hauh chuhtu an ni.