Kuminah SEDP board 15 tan cheng nuai 303 ruahman

Finance changtu chief minister Zoramthanga chuan, kumin sorkar sum kal mekah SEDP-a board 15-te tan cheng nuai 303 ruahman a nih thu, ZPM member C Lalsawivunga leh INC member Lalrindika Ralte zawhna ziaka chháng­in a tarlang.

Assembly session neih zawh taka Chief Minister-in zawhna a chhàn danin, SEDP board din a nih hun, November 2019 aṭanga sorkar kum tawp March 2020 thleng khan SEDB board-te tan hian cheng nuai 222 sên a ni a; sorkar kum kal mek 2020-21 chhungin SEDP board-te atan an awmna department-ah cheng nuai 303 dah a ni.

SEDP board tinah hian thla khata Rs. 34,575 hlawh LDC mi pahnih, Rs. 25,290 hlawh IV grade mi pahnih an awm a; vice chairman tan lirthei pahnih thla khatah Rs. 35,000 ve vein hman (hire) a ni. Sorkar kum liam ta bikah vice chairman-te pisa tur chei ṭhatna atan cheng Rs. 5,00,000 dah a ni bawk.

Board vice chairman zinga MLA-te chuan a hranpain hlawh an nei lo a, MLA ni lote chu thla khatah Rs. 40,000 pek an ni thung. MLA ni lo vice chairman pali an awm.

SEDP board-te hna­thawh zawhna chhangin Chief Minister chuan, "Board hrang hrangte hnathawh chu an awmna department-te hnathawh enpui leh hmasawn dan enfiaha a ṭul anga ṭanpui a ni," a ti.