Prime Minister-in CM-te lehkha a thawn State-ah sum tam thei ang pek kan duh: PM

Prime minister Narendra Modi chuan state chief minister-te hnenah lehkha thawnin, hmasawnna tura ruahmanna siam kawngah state sorkarin zalenna sang thei ang ber an neih theihna atan sorkar laipuiin sum tam thei ang ber pek a duh tih a hrilh.

Narendra Modi chuan, sorkarna an siam tirh aṭangin India ram chu state hrang hrangte inzawm khawm a nihna 'Federalism' tichak tur leh thawhhona ṭha a awm theihna turin theihtawp a chhuah tih a sawi a, "India ram mipuite hian an sorkar lakah beiseina sang tak an nei a, nghah zel hi an duh tawh lo. Hmasawnna chak leh huam kim thlentir turin kan bei a. Ram mipuite hnam ziarâng darhsarh tak mai thlir hian, state hrang hrangte ṭha taka thawhhona federal governance chak tak chauh hi kan tum ram rang taka min thlenpui thei tur a ni," a ti.

Prime Minister chuan, state sorkar a chak chuan India ram a chak dawn tih sawiin, "CM ka nih lai pawh khan ram pum­pui hmasawnna chu state-te hmasawnna leh hmasawn lohah a innghat tih ka sawi thin. He sorkar hian state sorkarte a theihna apianga tihchak a tum a ni," a ti a; state chak siam turin sum tam zawk leh zalenna zau zawk neia an mamawhnaah ruahmanna an siam theih a ṭul thu a sawi.

Sorkar laipui sum dinhmunah harsatna thlen dawn mah se, 14th Finance Commission rawtnate lawm takin an pawm tih sawiin, Narendra Modi chuan, "14th FC hian state sorkar leh central sorkarte insem ṭhin ram hausaknaah state sorkar chanpual chu 10% a tihpun a rawt a, kum 2015-16 chhunga state chanpual chu 2014-15 aiin nasa takin a pung dawn a, hei hian Central sorkar chu sum tam tak a hlohtir dawn a ni," a ti.

Prime minister chuan, Central sorkarin sum hloh dawn mah se, 14th FC rawtna chu a êng zawnga an thlir thu sawiin, scheme chi hrang hrangte chu an ngaih pawimawh leh an mamawhna zawnah chak zawkin kalpui theih a nih dawn thu CM-te a hrilh.

Prime Minister tarlan danin,14th FC rawtna ang chuan, state sorkar-te plan revenue expenditure chu state sorkarte kuta thuneihna pek aṭanga hmuh tur a ni tawh dawn a; mahse, sorkar laipui ngaih pawimawh zual - retheihna ûmbo, MGNREGA, education, health, rural development, agriculture-ahte sorkar laipuiin state sorkar a pui chhunzawm zel ang.

Narendra Modi chuan, India ram sum leh pai dinhmun tihhmasawnna turin hun remchang a inhawn thu sawiin, "Khawvel ram hrang hrangte'n India lakah beiseina sang tak an nei tih ka hria. India rama sumdawnna bul ṭan pawh an duh tih ka hria. India ram hmasawnna kawnga a thawhpuitu lo nih ve hi mi zawng zawngin an duh. Hei hi sorkar laipui tana hun remchang a ni ngawt lo a, kan ram pumpui tana hun remchang a ni," a ti.

Sorkar laipui leh state sorkarin a ngaih pawimawh ber reng tur chu - mirethei, lo neitu, mi narân te, hmeichhiatte leh naupangte an ni tih sawiin, PM Narendra Modi chuan, kut hnathawktute'n an theihna zawng zawng an phochhuah theihna tura anmahni dâltu lak bosak chu hmachhawp lian tak a ni thu a sawi bawk.