CYLA-in total bandh an chhunzawm

Central Young Lai Association (CYLA)-in Lai Autonomous District Council (LADC) huam chhunga tiam chin awm loa total bandh an huaihawt chu niminah pawh chhunzawm a ni a, an la tihtawp loh avangin vawiin lamah pawh an chhunzawm zel dawn.

CYLA total bandh hi February 24 zing dar 5-ah ṭan niin, tiam chin awm loa tih a ni a, zanah pawh an kalpui zel a ni. Bandh avang hian buaina leh harsatna lian tham thleng a awm lo a, zin veivak tur erawhin harsatna an tâwk. Lunglei aṭanga Lawngtlai district tawntirh, Thingkahah lirthei tangkhang ṭhahnem tak a awm a, chung mite chu Thingfal leh Thingkah mipuite'n an lo mikhual a ni.

CYLA hruaitute chuan, World Bank sum hmanga kawng laih Samang tlangdung paltlangtir an duh loh chungchangah, "Kawng laih hrim hrim hi kan duh lo a ni lo. Kaladan Multi Modal kawng laih dawn khan hmasawnna tiin, mipuite'n harsatna siam loin, thlanmual thlengin sawn a ni a. Chutiang a nih laia Lawngtlai khawpui hêl tur kawng laih tumna leh Samang tlangdunga kaltir a, Kaladan Multi Modal kawng pawhtir tumna hi kan duh lo a ni," an ti.

Power & Electricity divison an phût chungchangah CYLA hruaitute chuan, "Lawngtlai chiah hi district khawpui zingah P&E executive engineer nei lo awmchhun kan ni. Vawi eng emaw zat sorkar kan dâwr tawh a, file a kal mek thu chiah chhanna kan dawng," an ti a; chuvang chuan bandh neih mai a ngaia an hriat thu an sawi.

Lunglei leh Lawngtlai inkar kawng chu kum tam tak siam ṭhat a ni tawh lo nia sawiin, CYLA hruaitute chuan, "November 2014-ah a siamtu tur ABCI thlan fel tawh si, tun thlenga lungte pakhat pawh khawih chêt a la ni lo hi district mipuite hmuhsitna angah kan ngai," an ti.

CYLA hruaitute chuan an thil phûtah sorkar aṭanga thu lawmawm an hmuh hma chuan total bandh neih chhunzawm zel an tum thu Vanglaini palai an hrilh.