Chief Minister-in boruak siam duh vanga Total bandh siamah MNF a puh

Chief minister Lal Than­hawla chuan, MNF chu eirukna leh rorelna dik lo chungchangah sorkar puhna tur hre lo leh boruak siam duh vanga total bandh siamah a puh.

Vanglaini palai zawhna chhangin CM Lal Thanhawla chuan, MNF chu EVM hmang­a boruak siam tumah puhin, “EVM hmangin thâwm an nei thei lo a, tunah VVPAT an sawi leh tawh. Political party anga thâwm neih loh chu thil tih chi a ni lo a, corruption leh rorelna dik lo chungchangah puhna tur min hre si lo,” a ti a; thâwm neihna chu thu dik leh belhchian dâwl ni tur a ni tih a sawi.

Chief Minister chuan buhfai, tui bill, electric bill tihsan leh chhiah hrang hrang tihsan MNF-te’n ennawn an phût chungchangah, “Uchuak kan tih hi a inang lo thei. Ennawn ṭul a awm chuan kan ennawn ang a, a ṭul lo chu ennawh kher a ngai lo. Tute emaw nawr avanga ennawn chu a ṭul lo,” a ti.

Lal Thanhawla chuan tui bill chungchangah MNF sorkar laia an tui meter lei hman a nih thu sawiin, “MNF thil lei hi hman a nih chuan bill a sang lo thei lo,” a ti a; bill tihsual palh erawh a awm theih thu a sawi.

Buhfai man tihsan a nih loh thu sawiin, Lal Thanhawla chuan, “A tih dan tur angin kan ti a ni mai. Khaw hrang hrangah ka zin hnem a, complaint an awm pawh ka hre lo,” a ti.

Chief Minister chuan Mizoram chu kawlphetha siam chhuah nei lo a nih avangin kawlphetha hman man chu state dang aiin to mahse âwm a tih thu sawiin, “Tuirial HEP kha MNF-te khan kuttlingloa sum lak duh avangin tichhe lo se chuan power kan nei tawh ang,” a ti a; kawlphetha man chu Mizoram sorkar bituk ni loin, JERC bituk a nih thu a sawi.

MLTP Act hlih a nih chung­changa zawhna chhangin Lal Thanhawla chuan, “Zu chung­changah hian tu ngaihdan mah thunun chi a ni lo. Kohhranin zu zawrh loh an duh a, kan zuar lo a ni. A duh tan chuan zu in tur a awm reng tho. Sorkarin zu zawrh loh ṭhatna a hmu lo a, zu zawrh leh ṭul a ti a ni,” a ti.

Chief Minister chuan, Mizoram chu thawh chhuah nei si lo, chhiah pe tlem ber kan ni tih sawiin, chu chu thil dik a ni em tih mipuiin inzawt se a duh thu Vanglaini a hrilh