Congress sorkar a ṭha zawkah ngai

MPCC Communication department chuan thuchhuah siamin, khawvel ramte'n dan leh thupek kenkawhna an tehna ber chu, mipui him leh him lohah leh criminal record-ah a nih thu an tarlang a; MNF sorkar lai aiin Congress sorkarah dan leh thupek kenkawh a ṭha niin an sawi.

MPCC tarlan danin, chawhrual­in, kum tin MNF sorkar laiin thubuai 3647.1 ziah luh a ni a, Congress sorkar­ah chuan thubuai 2,595 ziah luh a ni. MNF sorkar laiin inrûkbo ṭum 23 a thleng a, Congress sorkar laiin vawi kua a thleng. Tualthah thubuai pawh MNF sorkar lai aiin Congress sorkar laiin 142-in a tlem zawk niin an tarlang.

MPCC chuan Zoramthanga leh Lal Thanhawla kaihhruai sorkar teh­khinin, buhfai, kawlphetha, tui leh ni tin mamawhah Lal Thanhawla sorkar laiin mipui an hnianghnar zawk niin an sawi a, "MNF-in Congress sorkara eirukna leh hlemhletna laka an fihlim lohna sawi tur an hriat loh laia total bandh an siam hi Lal Thanhawla chawimawinaah kan ngai," an ti.