KHAWTHLIR

Darlawn khaw nula Dr PC Vanlalhluii d/o Lalrammawii, tuna Bawngkawna cheng mek chu Darlawna Covid-19 veite enkawlna hmun, Covid Care Centre-ah hlawh nei loa thawk turin a inpe a, vawiin aṭangin a hna a zawm ang. Darlawn damdawi-in (PHC)-a nurse pahnihin Covid -19 an vei avangin hna an la zawm thei lo a, nurse pakhat chu home quarantine a ngaih bawk avangin nurse pahnih Hmangaihlalremruati d/o Lalkhawngaiha, Be­thlehem Vengthlang leh Lalbiakkimi d/o Zaliana, Kepran khuate chu Darlawn PHC-a thawk turin an inpe a; Darlawn PHC-a thawk tur bawkin laboratory technician pahnih K Lalchawimawia s/o K Malsawma, Ratu leh Caroline Lalnunpuii d/o A Lalrinmawia, Darlawnte an inpe bawk.

Lawipu Local Task Force ngenna angin Aizawl DC chuan Lawipui LC huam chhungah August 27 zing dar 1 aṭangin tiamchin awm loin total lockdown-ah a puang. Lawipui LTF aṭanga thu dawn danin, Melriata Covid-19 vei hmuh chhuah zinga miin arsa a pek kual chu Lawipu venga mi zingah lei an awma an hriat vang a ni.

State Referral Hospital-ah nimin khan Covid-19 vei mi pahnih dah luh thar a ni a, chu'ng mite nen chuan hripui vei mi 68 enkawl mek an ni. 

Nimin tlai dar 5:30 pelh hnu lawk khan Mizoram hmun hrang hrangah lir a nghing. Champhai leh Serchhip district lamah chuan a sawi na hle a, Tuipuiral hmun ṭhen-khatah thil tihchhiat a neih thu Vanglaini chuan a dawng.  

September 1, 2020-a ṭan tur Mizoram Legislative Assembly session atan Nilaini tlai thleng khan Assembly Secretariat chuan zawhna 297 an dawng tawh. Ni thum awh tur session atan hian zawhna House-a chhàn chi (starred question) 239 leh ziaka chhàn chi (unstarred question) 58 a lut tawh. Bill paruk leh House-a pharh tur paper pakua a lut tawh bawk.