Kumin chhungin RBI aṭangin Sorkarin ṭum 10 sum a pûk tawh

Mizoram sorkar chuan kumin chhungin, August 15 thleng khan sorkar sum dinhmun a ṭhat loha sum pûkna ṭhin special drawing facilities (special ways and means tih ṭhin) leh ways and means hmangin Reserve Bank of India aṭangin ṭum 10 sum a pûk.

Assembly session neih zawh tâkah ZPM Legislature Party leader Lalduhoma leh INC member Lalrindika Ralte zawhna ziaka chhángin Finance changtu chief minister Zoramthanga chuan, kumin chhungin special drawing facilities leh ways and means hmanga ṭum 10 sum pûk a nih tawh thu a tarlang.

Special drawing facilities leh ways and means hmanga sum pûk tawh zawng zawng chu cheng vbc. 208.18 a ni a, pûk tam ber ṭum June 4, 2020-ah cheng vbc. 42.34 pûk niin, pûk tlem ber ṭum June 9, 2020-ah cheng vbc. 5.11 pûk a ni.

State sorkarin RBI aṭanga sum a pûk dawn chuan, special drawing facilities hmangin a pûk hmasa ber tur a ni a, a pung pawh a tlem ber. Sum pûk chu a rùl thei lo a nih chuan ways and means hmangin a pûk leh thei a, a la rùl thei lo cheu a nih chuan overdraft hmangin a pûk leh thei. Overdraft hnua a rûl thei lo a nih chuan state treasury khâr a ngai tawh ṭhin.

Special drawing facilities leh ways and means hmanga sum pûk hi ni 90 chhunga rulh tur a ni a, overdraft hmanga sum pûk chu ni 21 chhunga rulh tur a ni thung.