Tu sorkar mahin zu an tirêm theiin ka ring lo - CM Hawla

Chief minister Lal Thanhawla chuan, tu sorkar mahin zu an tihrêm leh an tihreh theih a rin loh thu a sawi a, “Zu zawrh hi a ṭha lo tih Zoram pumin an pawm hunah chuan kan sût leh mai ang,” a ti.

Lal Thanhawla hian nimin khan Congress Bhavan-ah thu sawiin, “Zu zawrh phal loh a nih khan kan tlin lo. A ṭha ber tlin loh chuan a chhe nêp deuh a awm em tih kan dap mai a ni. Zu hi tu sorkar mahin an tihrêm leh tihreh theih ka ring lo,” a ti a; a ṭha ber tlin loh chuan a
ṭha ber dawttu ngaihtuah a ṭul ṭhin thu a sawi.

Sorkarin zu a zawrh loh thu sawiin CM Hawla chuan, “A ṭha zawk zawngin inthlahrung tak chungin zu in lo thei lote’n zu ṭha zawk leh man tláwm zawk an in tur ngaihtuah hi sorkar chuan a khua leh tuite tana tih tur a ni. Sorkar chuan zu zuar duhte’n an zawrh theihna tur dan a siam a, zu zuara sorkar an puh chuan dâwt a ni,” a ti.

Chief Minister chuan, sorkarin inthlahrung tak chungin MLPC Act a hmang nia sawiin, “Zu khapna dan hlîptu nih hi kan inthlahrung. Mahse, a ṭha ber a tih theih loh chuan a ṭha ber dawttu ngaihtuah a ngai a ni,” a ti a; in-thlahrung tak chungin, loh theih lohna vangin MLPC Act chu kalpui niin a sawi.

Lal Thanhawla chuan, MLPC Act chu kum khat hman a nih tâk avangin eng nge a nghawng leh thil ṭul hrang hrang zir chiang turin Committee din a ni dawn tih a sawi a, “An recommendation aṭangin sorkar chuan ngaihtuahna thar a nei mai thei. Tihsual palh kan nei a nih chuan thawm ṭhat kan inhuam a ni,” a ti.

Police-te awm lohna hmunah chuan zu vanga harsatna siam leh zu rûite chunga a
ṭul anga hma la turin VDP-te’n thuneihna an nei tih sawiin Hawla chuan, “Court-a hruai an ngai a nih pawhin V/C-te hi magistrate third class thuneihna nei an ni,” a ti a; hmun kilkhâwr zawka MLPC Act bawhchhiate laka action lak a nih theihna atan mithiam zawkte ráwnin hmalak zel a nih tur thu a sawi.

Chief Minister chuan, zu zawrh chu kohhran zingah Synod bakin an doa a hriat loh thu sawiin, “Synod hian zu zawrh duh loh vangin kawng zawh an tum a, zawhpui tur an hmuh loh avangin an ṭhulh. Kohhran dang hi chuan sorkar policy kal lai a nih avangin a lang a pauin an dodal loin ka hria, ka hre sual mai thei,” a ti.

Hydel project chungchang sawiin CM Lal Thanhawla chuan, “Tuikhuah theih zawng zawng kan khuap vek lo ang. Tuikhuah hian ram a lak nasat bakah sik leh sá a siam dang-lam thei a ni,” a ti a; mithiamte ráwn chungin hydel project buaipui zel a nih tur thu a sawi.