Lungawi lohna lantir nan doctor-te’n Badge dum an bel

All India Federation of Government Doctors’ Association huaihawtin nimin khan India ram pumah sorkar hnuaia thawk doctor-te’n lungawi lohna lantir nan duty chhungin badge dum an bel a, Mizorama sorkara thawk doctor-te pawhin badge dum an bel.

Mizoram Govt. Doctors Association (MGDA) tarlan danin, sorkara doctor-te’n lungawi lohna an lantir chhan chu - state hrang hranga doctor-te hlawh inang lo chu Medical Grant Commission din a, ‘same work, same pay’ thupuia neia hlawh inang tlanga siam an phût vang a ni.

Parliament-in doctor-te dinhmun en ṭha tur committee a din, Health secretary hlui Javed Chaudhary kaihhruaiin doctor-te Non Practising Allowance (NPA) 30%-a tihpun a rawt laia 7th Pay Commission-in 20%-a tihhniam a tum an duh loh vang leh basic pay-a chhiar tel tawh loh tur tia a rawtna an duh loh vang te; sorkar damdawi-inah hmunhma leh hmanraw ṭha zawk an phût vang leh thawktute kutthlak an tawh fo loh nana himna lam ngaihtuahsak an phût vangte a ni bawk.