Gauhati High Court-in SEC thu a pe SEC-in High Court thupek a khing let

Lai Autonomous District Council (LADC) inthlana Cheural bialah vote thlak nawn mi pali an awma hriat vanga MNF candidate Michael DL Kompa-in State Election Commission (SEC)-a complaint a thehluh chungchangah, Gauhati High Court Aizawl Bench chuan SEC chu thla khat chhunga report thehlut turin a ti. SEC hian HC-ah report thehlut loin, thupek chu Gauhati High Court Division Bench (double bench)-ah an khing let nia thu dawn a ni.

November 28, 2015-a LADC inthlan result hi November 28, 2016-ah puan a ni a, Michael DL Kompa hian Cheural bialah INC candidate L Lawmkima chu vote khatin a hneh lo. Result hi government gazette-in December 17, 2015-ah tihchhuah a ni. Cheural bialah hian khaw pahniha vote thlak nawn mi pali an awm nia hriain, Michael Kompa chuan December 1, 2015-ah SEC-ah complaint a thehlut.

High Court single bench order-a a lan danin, Michael Kompa hian complaint hi inthlan result government gazette-a December 17-a tihchhuah a nih hmain December 1-ah a thehlut hman a, SEC pawhin a pawm a; SEC chuan December 9-ah Lunglei District & Session Judge Marli Vankung chu Commissioner of Inquiry-ah ruatin, chhui turin a ti a ni.

Commissioner of Inquiry chuan Michael Kompa leh SEC-te chu thu a zawtfiah ve ve a; February 16, 2016 khan SEC chuan Commissioner of Inquiry hnenah lehkha thawnin, Michael Kompa-a’n complaint a thehluh rualin security deposit atan Treasury challan hmangin Rs. 100 a thehluh loh thu leh complaint chu thu tlinga ngaih theih a nih loh thu a tarlang. Hemi ni vek hian SEC chuan Commissioner of Inquiry chu a ṭhiat nghal.

Michael Kompa chuan, De-cember 1, 2015-a SEC-a comp-laint a thehluh laiin security deposit an phût lo a, Treasury challan hmanga thehluh a ngaih thu an lo hrilh lo a, chuti chung chuan a lehkha chu SEC-in an lo dawng niin a sawi.

Michael Kompa chuan February 17-ah Treasury challan hmangin security deposit Rs. 100 chu SEC-ah a thehlut a; mahse, SEC chuan gazette-a inthlan result tihchhuah aṭanga thla hnih a liam tawh tih chhuanlama hmangin, ni hnihin a tlai tih ziakin February 19-ah pawisa chu demand draft no. 117577 hmangin an thawn let a ni.

Michael DL Kompa chu May 4, 2016-ah Gauhari High Court-ah a zualko a, High Court chuan May 6, 2016-ah order a tichhuak. HC order chuan, SEC-in Michael Kompa complaint thehluh a pawm a, a chhui turin Commissioner of Inquiry pawh a din vek tawh tih a tarlang a, "SEC hian a thil tih dik loh thup nan complaint thehluh hi hnâwlna kawng a zawng tur a ni lo," a ti.

High Court order chuan, Mi-chael Kompa complaint chu thil serious tak a nih thu tarlangin, inthlan result gazette-a chhuah hmaa complaint thehluh a nih avang leh a lo pawm tawh avangin SEC chu Treasury challan nena security deposit thehluh phalsak turin a hriattir a; mi palite'n vote an thlak nawn leh nawn loh chhui a, thla khat chhunga report thehlut tura a hriattir bakah, Commissiner of Inquiry
ṭhiah tawh pawh case a fel hma chuan nung reng turin a ti bawk.

Michael DL Kompa hian High Court thupek angin, May 31, 2016-ah Treasury challan hmangin security deposit chu SEC-ah a thehlut a ni.

Thu dawn danin, SEC hian High Court single bench order chu tihlawhtling loin, court sang zawk, Gauhati High Court Division Bench-ah appeal a thehlut a ni. Hetihlai hian, Michael Kompa ukil C Lalengliana chuan High Court Division Bench
aṭangin kohna emaw, lehkha emaw an la hmuh loh thu a sawi.