ZNP Kolasib Block pum kan lawm lut: MNF

MNF chuan thuchhuah siamin, nimin khan MNF president Zoramthanga’n Kolasib Diakkawn YMA Hall-ah ZNP Kolasib Block pumpui leh unit-te bakah, party dang aṭangin mi eng emaw zat a lawm lut niin an tarlang a, “An vaiin mi 446 MNF-ah a lawm lut,” an ti. Hetih lai hian ZNP Kolasib Block chuan MNF lawm luhte hi a tak awm lo an ni, an ti thung.

Lawm luhna inkhawmah thu sawiin Zoramthanga chuan, “Vawiina MNF buh seng hi buhphal leh buh vâwng mai ni lo a, a chhêk-in, buh zêmpui nen lama mi thar kan lawm lut thei hi kan vannei a, ram siam duhna thinlung neitute rilru Pathianin a kaih harh vang a ni,” a ti.

Zoramthanga chuan, party pakhat hruaituin Peace Accord 1986 sawi nêp tuma MNF leh Home Ministry inremna mai niin a sawi tih sawiin, vanduaithlak a tih thu a sawi a, “Central sorkar, prime minister Rajiv Gandhi sorkar aiawhin Home secretary RD Pradhan-a’n hming a ziak a, Mizoram sorkar leh Mizo mipui zawng zawng aiawhin chief secretary Pu Lalkhama leh MNF aiawhin Pu Laldenga’n a ziak bawk,” a ti a; anni lo chu inremnaa hming ziak tur dang an awm loh thu a sawi.

Memorandum of Settlement chu India Constitution tihdanglam ngai hial khawp a ni tih sawiin, Zorama chuan, “Mi pathumte hming sign kha sawi bawrhbân chi a ni lo,” a ti.

Party president ṭhenkhatte’n MNF-in kum 5 vel chauh independence sual ang leh kum 15 chhung India-a luh sual anga an sawi ṭhin chungchangah “Mitdel sai pang deh thu mai a ni. Kum tam tak India nen kan inbiak lai khan kan thuthlung pakhatmah kan tlansan lo a, indenpendence sualna thinlung kha inbiaknain a khawih che lo. Inbiakna tel loin khawi ram independence sualtute mahin engmah an hlawhchhuak ngai lo,” a ti.

MNF President chuan, MNF-te’n silai hûma zalenna an sual laiin mi 3,000 dáwnin nunna an chán tih sawiin, chuti chunga zalenna sual lo anga sawi awm ṭhin chuan mi ṭhenkhat rilru a tina thei dawn hlea a hriat thu a sawi bawk.

MNF tarlan danin, MNF-a lawm luhte zingah ZNP Kolasib Block president Laldingliana leh OB pathum bakah ZNP mi 211, Congress party mi 203, MPC mi 11, BJP mi pakhat leh neutral 15 an ni.

Hetih lai hian ZNP Kolasib Block chuan thuchhuah siamin, MNF-in mi an lawm luhte chu a tak awm lo niin an tarlang a, “Kolasib ZNP Block hruaitu Laldingliana leh a ṭhiante hi kan ui hle chungin, an chhuak ta hi Kolasib Block tan malsawmna thlentu an ni ta zawk. ZNP policy ṭha titu kan pung zel hi lawmawm kan ti hle,” an ti. Laldingliana chuan meeting vawi khat pawh a ko thei lo niin an tarlang.