KHAWTHLIR

NEDP committee

Mizoram sorkar chuan New Economic Development Policy (NEDP) atan committee pathum a din. Committee a dinte chu Chief Minister kaihhruai tur Core Committee, Chief Secretary kaihhruai tur Executve Committee leh Planning Board Vice Chairman kaihhruai tur Monitoring & Evaluation Committee-te a ni.

Thisen pe

KM Higher Secondary School chuan, nimin khan Aizawl Civil Hospital tan thisen unit 96 an pe a, a petute mipa 73 leh hmeichhia 23 an ni. State Bank of India-a thawkte pawhin Aizawl Civil Hospital-ah thisen unit 29 an pe a, a petute mipa 28 leh hmeichhia pakhat an ni.

Hri danna sawiho

Lunglei District Task Force for Immunization chu nimin khan Lunglei DC Abhijit Vijay Chaudhari hoin a pisaah an ṭhukhawm a; Mission Indradhanush kalpui mek dan leh kalpui zel a nih dan tur te an sawiho. Mission Indradhanush hi Lunglei district-a kalpui a nih aṭangin naupang kum hnih tling lo 1,617 hnenah hri danna pek tawh a ni.

Rálvèn bûk

Champhai Vengthlang YMA Rálven Bûk chu Ningani khan bialtu MLA TT Zothansanga'n a hawng. Ralven Bûk hi bialtu MLA LAD fund Rs. 5,00,000 hmanga sak a ni a, information centre, waiting shed leh dawr pathum a awm.

MCS training zo

Mizoram Civil Service (MCS), kum 2016 batch-te chuan Rural Develop-ment scheme hrang hrangte zir chianga June 16, 2016 aṭanga SIRD, Kolasib-a training an neih chu nimin khan an zo a; a kharna inkhawm neih niin, Kolasib SP C Lalzahngoa'n certificate a hlan.

Heroin man

Excise & Narcotics department hnuaia Anti-Narcotics Squad-te chuan nimin zing dar 6:30 khan Dawrpuiah heroin gram 221 leh a neitua puh Ngunsingluai (43) s/o Tlanglianthang (L) leh Kimmenpar (20) d/o Ngurthawngsin Chawhte, Myanmar nia inchhálte an man.