Railway hotute'n Larsap leh CM an kawm

North East Frontier Railways hotute chuan, nimin khan Raj Bhavan-ah Governor Lt.Gen. Nirbhay Sharma an kâwm a, chief minister Lal Thanhawla pawh a pisaah an kâwm bawk.

NEF Railways hotute chuan, Bairabi leh Sairang inkara rél kawng siam hna chu kum 2019-a zawh a nih theih nan theihtawp an chhuah thu an an sawi.

Governor chuan, Mizoram mipui hmasawnna atana thil pawimawh ber pakhat a nih avangin Railways hmalakna chu theihtawpa thlawp a tum tih a sawi a; NEF Railways hotute chu rel chawlhhmun an siam danah ram hmélhmang mil zawng, ramngaw tichereu lo zawng leh Mizote rílrem zawng ngaituah tel turin a chah.

Bairabi leh Sairang inkara rel kawng siam hna thawktu contractor-te chu company hrang hrang an nih avangin tute mah innghah khawtlaitir lo a, an hnate thawhtir theih nia a hriat thu sawiin Larsap chuan, "Rel kawng vanga Mizoramin hlâwkna a hmuh hun chu rêlin Sairang a thlen hun a ni dawn. Mizo mipuite'n chak taka hna thawh an beisei," a ti.

Inkawmnaah hian Mizoram aiawh official-te chuan, Bairabi rel chawlhhmunah Mizoram quota buhfai hlân thlak chung-changa harsatna an neih chungchang an sawi chhuak a; Governor ngenna angin Railways hotute chuan buhfai hlân thlakna hmun chu fûr a zawh hunah RCC-a siam a nih tur thu an sawi.

NEF Railways (Construc-tion) general manager HK Jaggi chuan, rél kawng phah hna chak zawka thawh a nih theih nan NH-54 kawngpui chhe lai tlem azawng siam ṭhat ni se a duh thu a sawi a, "Hna kan thawhnaah harsatna lian tham kan tâwk lo a, sorkar leh mipui chungah kan lawm hle," a ti.

NEF Railways chief engi-neer AK Yadav chuan, Bairabi leh Sairang inkara rel kawng siam hna an thawh dan leh thil pawimawh hrang hrangte a lem nen a sawifiah.

Chief Minister-in an hna-thawh chak dante hun an bituk angin an thawk thei em tih a zawhna chhangin HK Jaggi chuan, "Tlang ramah chuan lui kân leh lei verh a ngaih avangin rel kawng sialna kawngah chona tam tak a awm a, tun dinhmunah chuan kan hnathawh dan chu kan hun ruat angin a la kal," a ti.

Lal Thanhawla chuan, Mizoram chu tlang ram leh India state kilkhâwr berte zinga mi a nih avangin India hmun dangte angin hnathawh a awlái lo a, fûr ruahtui a tam vangin kum khatah thla 5/6 vel lek hna thawhna hun a awm tih sawiin, "Hna thawhna bungruate state páwn aṭanga thiar luh a ngaih avangin project man a to bik ṭhin," a ti a; Mizoram dinhmun chu Delhi-a project sanction tute'n an hriatthiam loh fo thu a sawi.

Bairabi-Sairang rél kawng phah tur hi km. 51.30-a thui ni a, lei verh tur leh lei dawh ngai zawng zawngte belhkhawm chu km. 16.365-a thui a ni. Lei verh tlang tur hmun 23-ah a awm a, lei dawh tur hmun 44-ah a awm. NEFR (Construction) estimate ang chuan, rel kawng phah hna hi March 2019-a zawh hman tum a ni.