Thil ṭha zawk thlenna tur a nih chuan Inphahhniam kan hreh lo: Home Minister

Home minister R Lalzirliana chuan, thil ṭha zawk thlenna tur a nih dawn chuan Mizoram sorkarin inphahhniam zawka
ṭan a hreh loh thu a sawi.

Zawlbuk group YMA bultuma Ningania Thing-sulthliah khelmuala Remna Ni lawmna a hman-puinaah thu sawiin Home Minister chuan, "Tun aṭanga rei lo têah Mizoram sorkar leh HPC(D) an inbe dawn a, hlawhtlinna duhawm kan neih theihna atan Mizo mipuite
ṭawngṭaipuina kan mamawh. Sorkar chuan mi zawng zawng nen inrem tlang taka awm a duh ber a, thil ṭha zawk thlenna tur a nih chuan a inphahhniam zawka ṭan pawh a hreh lo," a ti.

Home Minister sawi danin, Mizoramin kum 30 kal taa zalenna an hmuh laiin a hnu rei loteah HPC(D) demand area china chengte chuan kum li vel chauh remna an chên a, harsatna leh hriatthiam loh chi hrang hrang an neih avangin ramhnuai lamah mi eng emaw zat silai nen an bibo a, kum 26 chhung mipuite'n hrehawm an tuar tawh a ni. Tunah hian khawtlang hruaitute leh kohhran hruaitute hmalaknain remna kawng dap a ni.

R Lalzirliana chuan, mipuiin remna hlutzia an hriatthiam loh a hlauhawm thu sawiin, "Zu rûi buai leh mi awmherh ṭhenkhat vanga veng leh veng, khua leh khua inepna a thleng ṭhinte hi a pawi em em a, thil dik lo titu chu hum kher tum loin, dikna i ngai pawimawh hmasa ber ṭhin ila. Heng harsatna tam tak hi kan pumpelh ṭhin dawn a ni," a ti.