Lengpui-in polythene awm lohna nih an tum

Lengpui khaw mipuite nimina kalkhawm chuan resolution pass-in, an khua chu polythene hman lohna leh awm lohna khua a nih theih nan hmalak an rêl.

Tlangnuam BDO Office leh Lengpui VC/VEC chuan nimin khan Lengpui community hall-ah mipuite hnena thingtlang tihhmasawnna tur scheme hrang hrang zir chianna, 'Gram Sabha cum Awareness Campaign on various Rural Develop-ment Scheme' an buatsaih a; Lengpui mipuite chuan, polythene hman lohna leh awm lohna khua ni tura hma la turin thutlukna an siam a ni.

Lengpui resolution-ah chuan, "Lengpui khaw mipuite'n an thlah kal leh zel turte tana chenna tlak khawvel an siam theih nan leh khawpui thianghlim leh fai a nih theih nan bawlhhlawh paih danah, bawlhhlawh ṭawih thei leh ṭawih thei lo thliar hrang zel tura hma la ṭan turin leh, polythene-in a tihbuai loh khua a nih theihna tura polythene hman lohna leh awm lohna khua ni tura hma la ṭan turin thutlukna siam a ni," tih a ni.