DC-in V/C pathum a kokhawm

Kolasib DC H Lalengmawia chuan, nimin khan a pisaah Mual-khang V/C leh Railways contractor-te inkara inhriatthiam lohna awm ṭhin chinfel a nih theih nan Kawnpui, Khamrang leh Mualkhang V/C-te a kokhawm a; harsatna awmte an sawiho.

Sorkar thuchhuah tarlan danin, Railways contractor-te hnenah pawisa dil an awm ṭhina hriat a ni a, a bikin tun hnaiah Mualkhang-ah pawisa dil an awm ṭhina hriat a ni.

Meeting chuan, tun hnuah khawtlang hruai-tute'n Railways hna-thawkte hnen aṭanga donation khawn emaw, khawtlang mamawh thlente chu tih tawh loh ni se, an ti. Harsatna a awm chuan district administration-ah thlen zel ṭhin tur leh thawhhona ṭha tak hnuaia hna tluang taka a kal a, rêl a luh thuai theihna atan khawtlang leh mi tinin mawhphurhna lian tak an neih thu tarlan a ni.

V/C-te chuan, an khaw chhunga thil thleng chu pawi an tih thu leh a thlen tawh lohna tura hma an lak tur thu an sawi a; Railways hnuaia hna thawktu company ti-
ṭhuanawp lo tur zawnga mipuite inhrilhhriat dan tur an ngaihtuahho nghal bawk.