LADC-ah HSSLC exam buatsaih thei dawn lo? Exam hun hranpa buatsaih a ni lo ang - MBSE

Central Young Lai Asso­ciation (CYLA)-in LADC huam chhunga bandh an buatsaih mek avangin vawiina Higher Secondary School Leaving Certifcate (HSSLC) exam turte'n harsatna an tawk dawn niin a lang. Mizoram Board of School Edu­cation (MBSE) chuan HSSLC exam thei lote tan a hranpaa exam an buatsaih theih dawn loh thu an sawi.

MBSE chuan thuchhuah siamin HSSLC exam ṭan hun dawna CYLA-in bandh an siam chu pawi a tih thu sawiin, "He bandh avanga zirlai naupang HSSLC exam thei lote tan a hranpaa exam dang nakinah buatsaih thei a ni dawn lo. Exam an beih leh theihna hmasa ber chu kum 2016 a ni ang," an ti.

Hetihlai hian, CYLA president V Vanlianhrina chuan, sorkar aṭanga thu lawmawm an hmuh loh chuan bandh kaltlangpui zel chu an thutlukna a ni tih a sawi a; HSSLC exam tur dan loh chungchang rel a nih loh avangin tuna an thutlukna ang chuan exam turte pawh dan an nih tur thu Vanglaini palai a hrilh. He thuziah lai thleng hian CYLA chuan total bandh hi neih chhunzawm zel an tum.

LADC chief executive member V Zirsanga chu nimin khan pisa kai turin a kal a, mahse bandh duty-te ngenna avangin a kîr leh a ni. V Zirsanga chuan, CYLA hruaitute chu sorkar hmalak dan ngaichâng chunga mipui tawrhna thlen lo zawnga hmalak ni thei se a duh thu a hrilh.

CYLA hruaitute hnen aṭanga thu dawn danin, Kohhran Hruaitu Committee chuan nimin khan CYLA hruaitute hmuin, bandh an buatsaih chungchangah moral support an pek thu an sawi a, mipui tana harsatna lutuk awm lo zawnga hma la tura an duh thu an hrilh.

CYLA hian thil pathum an phût sorkarin a tihhlawhtlin loh avangin February 24 zing dar 5 aṭang khan total bandh an huaihawt a, nimin zing kar aṭanga dar 9 thleng châkkhai lamna hun an hawn bakah chu duty ngawrh takin an kalpui a ni.

Hetihlai hian CYLA chuan total bandh an huaihawt thlawp lotu Diltlang YLA an suspend a ni.