Zirtirtuten sikul ṭan hma ṭha ti Traffic jam sut kian tumna a ni lo

Mizoram Primary School Teachers Association (MPTA) hruaitute chuan, nimin khan School Education minister H Rohluna chu a pisa-ah hmuin, sikul kai hun sawn hma tur chu ṭha an tih thu an hrilh.

MPTA hruaitute leh School Education Minister inkawmnaah hian sikul kai hun sawn hma chu khawpui traffic tâwt tihziaawmna atana tih a nih loh thu sawi lan a ni.

H Rohluna chuan, zirna chu hnam rohlu a ni tih sawiin, "Kan hnam dam khawchhuahna chu zirna hi a ni tih kan hotute'n an hre chiang a, parliamentary secretary-in a ngaihna a hre bawk a, kum khat chhungin kawng tam takah a hlawhtlinna kan hmu a ni," a ti.

Minister ṭawiawmtu parliamentary secretary (Education) Joseph Lalhimpuia chuan, "Sikul ṭan hun sawn hma turah study group-te'n an zir chianna point tam tak zingah mi ṭhenkhatin an sawi lan fo - khawpuia traffic tâwt tihthâwlna lam a lang lo," a ti a; kawng hrang hranga hlâwk zawk tura ngaih a nih avangin sorkarin sikul kai hun a sawn hma thu a sawi.

MPTA hruaitute chuan, Education Centre sak a nih dawn avang te, sum harsa tak kara midday meal atana state matching share ngaihtuah a nih avang te, zirtirtu lak thar a nih avangte leh, SSA deputy state project director leh dy. DPC atana primary school zirtirtu dah a nih avangatein minister H Rohluna chu lawmthu an hrilh a ni.