KHAWTHLIR

KTP Rorel Inkhawm
KṬP General Conference neih loh kuma neih ṭhin, KṬP Rorel Inkhawm chu zanin hian Mission Veng biak-inah ṭan a ni dawn a, nak­tukah nilengin rorel a ni ang a, Pathianni zanah a ṭiak ang. Rorel Inkhawm Thlengtu Committee chuan, four wheeler kengte chu PC Girls School kawt leh Synod Conference Centre kawt­ah leh, two wheeler-te chu Synod Office kawt leh Mendus building bul­ah te dah turin an ngen.

Youth Festival
Central Agricultural University hnuaia Intercollegiate Youth Festival vawi khatna chu nimin khan Vety College, Selesihah ṭan a ni a, Aizawl DC Dr. Franklin Laltinkhuma'n a hawnna inkhawm a hmanpui. Festival-ah hian CAU hnuaia hmarchhak state-a zirlai 175 vel an kalkhawm a ni.

Ph.D hmu thar
K Lalbiakchhunga (IDAS) s/o K Zahmuaka, Ramhlun North chuan Jawaharlal Nehru University, New Delhi-a Centre for American Studies aṭangin doctor of philosophy a hmu thar a, a thesis title chu, 'Role of US in Dismentlement of Weapons of Mass Destruction in former Soviet Union 1991-2000' tih a ni.

MPCY lawm
MPC ṭhalaite chuan thuchhuah siamin, 14th Finance Commission-in kum nga chhunga kum tin cheng vbc. sang hnih chuang sum indaih lohna phuhrûkna tura a pe dawn chu lawmawm an tih thu an tarlang a; ram mipuite hmakhua ngaia rualkhai taka hmang turin sorkar an ngen.

Kissan Mela
Agriculture Technology Management Agency (ATMA), Serchhip distict chuan nimin khan Serchhip Bazar chungah Kissan Mela an buatsaih ṭan. Kissan Mela-ah hian thlai chi hrang hrang phochhuah a ni.

CYMA leh MFA
Central YMA leh Mizoram Football Association hruaitute chu, April 21 aṭanga ram pum huap YMA branch-te football inelna buatsaih dan tur ngaihtuahin nimin khan CYMA office-ah an ṭhukhawm