CM hoin MSTC an ṭhukhawm

Mizoram Science & Technology Council (MSTC) chu nimin khan CMO-a Cabinet Room-ah an ṭhukhawm a; chair­man Lal Thanhawla, chief minister chuan, MSTC thil tum ber chu science leh technology lam chawisan a nih thu a sawi.

Chief Minister chuan, Science & Technology Council chu kum 1971-a Central sorkarin a din a­ṭangin state tam zawkin an neih tawh thu sawiin, "Keini hi a hnuhnung pawl kan ni mai awm e. Mizote hi tun hma chuan science leh mathematics hi kan zuam loh ṭhin avangin kan hnufûm bik ṭhin a ni," a ti a; tunah chuan ṭhalai science leh mathematics-a thiam tak tak an awm tawh thu a sawi.

Meeting-ah hian zirna-ina science laboratory tihlâr leh enkawl dan chungchang te, industry leh science lama tui mite intawhkhawm siam a, thil thar siam leh hmuhchhuah tharte chawisan leh, sum chang theia siam dan te, district tina district level science centre hawn te, ruahtui dahkhawlna tura a hmanruate tlangzarh theihna tura Nodal Centre din chungchangte leh, MSTC chu Societies Registration Act, 2005 hnuaia ziahluh chung­changte an sawiho.

MSTC hi kum 1984-a din a ni a; chairman-ah Chief Minister, vice chairman-ah Planning Minister leh member secretary-ah chief scien­tific officer ruat a ni.