March 2-ah maxi-cab sawn chhuak dawn

Aizawl Municipal Council (AMC) chuan March 2, 2015 aṭangin Aizawl khawpui chhunga maxi-cab stand-te chu khawpui daifem hmun pali-ah a sawn chhuak dawn a; he ruahmanna hi thuawih taka zawm turin maxi-cab enkawltute an ngen.

AMC executive coun­­cillor (Parking of Vehicle) Rosiamngheta chuan nimin khan AMC conference hall-ah thuthar thehdarhtute kâwmin, maxi-cab stand sawn dan tur a sawifiah a; maxi-cab stand sawn chu AMC, Mizoram Maxi Cab Owners Association, traffic police leh Aizawl City Local Council Asso­ciation-te sawiho hnua thutlukna a nih thu a sawi.

Rosiamngheta sawi danin, AMC (Control of Parking and Collection of Parking Fees) Regu­lation, 2012 hnuaiah Parking Committee-in November 17, 2014-ah maxi-cab stand khawpui daiféma sawn a rél a; chu chu December 12, 2014-a Board of Councillors meeting-in a pawm a ni. Aizawla lut leh chhuak maxi-cab 1,100 chuang hret a awm.

Aizawl khawpui tâwt lutuk chu tihziaawm dan ngaihtuaha hmalak a ngaih thu sawiin, Rosiamngheta chuan, "Mipuite kan him tlan zawkna ngaihtuahin tuna thultukna hi kan siam a ni," a ti a, khawpui tana ṭha ber tur an ngaihtuah zel dawn thu leh, maxi-cab stand sawn chhuah chu miretheite hmuhsitna a nih loh thu a sawi.

Rosiamngheta chuan, maxi-cab dinna tura ruahmanna thar an siam chu thuawih taka zawm tur leh harsatna siam zawnga awm lo turin maxi-cab neitute leh khalhtute a ngen a; local council tin, police leh traffic police-te chu a ṭul ang zela ṭawiawm turin a ngen bawk.

AMC official-te chuan, maxi-cab-te chu Aizawl khawpui chhungah passenger-te an thlah thei dawn tho a, maxi-cab dropping zone hmun pasarihah an siam belh thar tih an sawi.

Zawhna chhangin, Rosiamngheta chuan, maxi-cab stand thar an ruahmanahte chuan zunram thiarna ṭha leh chawlh hahdamna turte siam an tum tih a sawi a; Aizawl khawpui chhunga motor parking-te chu tihtlem tial tial an tum thu a sawi bawk.