MHIP-in Ruby Jubilee an lawm

Mizo Hmeichhia Insuihkhawm Pawl (MHIP) chuan, nimin khan Lammualah MHIP kum 40-na, Ruby Jubilee an lawm a, chief minister Lal Thanhawla khuallian a ni.

CM chuan, Aizawl Municipal Council leh village council-ahte hmeichhiate tan seat hauhsak a ni tawh tih sawiin, chungte chu lawm taka pawm turin MHIP-te a ngen.

MHIP Ruby Jubilee lawmna hi MHIP gen.hqrs. president Lalthlamuani'n a kaihruai a; Mizo hmeichhiate tana hamṭhatna sorkarin a siamte leh, inneih leh inṭhen thuah Mizo hmeichhiate'n chanvo an neih theihna tur dan siam a nih avangtein CM Lal Than­hawla leh a nupui Lal Riliani-te hnenah chawimawina thuziak an hlan.

Chief Minister chuan, dan hre mi a ni lo a, mithiam a ni lo bawk tih sawiin, "Hmeichhiate hamṭhatna leh chawikanna tura sorkar hmalakna hi ka thawhpui Law Commission leh MLA mithiam rualte ngaihtuahna aṭanga lo chhuak a ni," a ti a; amah an chawimawi chu phû lo mah se, thinlung taka a lawm thu a sawi.

Lal Thanhawla chuan, hmei­chhiate an pawimawh tih sawiin, "Ringtu zingah phei chuan an pawimawh lehzual. Kohhran bul inṭanna chu chhungkuaah a ni a, pate awm bawk mahse fate enkawl kawngah nute hi an pawimawh tak zet a ni," a ti.

CM Lal Thanhawla chuan, tualchhung rorelnaa hmeichhiate tana seat hauhsak chu lawm taka pawm turin MHIP-te a chah a, "Kan awmna apiang hi Pathianin a rawng bâwl tura min dahna a ni a, rinawm leh dik takin, Pathian ṭihna nen hna thawh hi kan bat a ni,' a ti.

MHIP Ruby Jubilee lawmnaah hian hnam lam chi hrang hrang an entir a, MHIP gen.hqrs. zai­pawlpuiin hla an rem a, malzaite a awm bawk.

Home minister R Lalzirliana, deputy speaker R Lalrinawma, Mizoram Youth Commission chairman T Sangkunga leh Mizoram State Commission for Women chair­person Vanlalawmpuii Chawngthu-te pawhin jubilee hi an hmanpui a ni.