MSACS-in blood bag 8,530 an dawng

Mizoram State AIDS Control Society (MSACS) chuan tun hnai khan National AIDS Control Organisation (NACO) aṭangin blood bag 8,530 an dawng a; MSACS chuan district hospital hrang hrangah an sem chhuak nghal.

MSACS-in blood bag a sem dan chu - Aizawl Civil Hos­pital-ah 3,930, Saiha District Hospital-ah 300, Lunglei District Hospital-ah 600, Christian Hospital, Ser­kawnah 500, Lawngtlai District Hospital-ah 300, Champhai District Hospital-ah 300, Serchhip District Hospital-ah 300, Kolasib District Hospital-ah 300 leh Mamit District Hospital-ah 100 a ni a; sem chhuah loh 1,900 a la awm.

MSACS hotute chuan kum khata Mizorama thisen mamawh chu unit 23,400 vel a nih thu sawiin, "Tuna blood bag lo thleng hian thla thum vel a daih ang," an ti.

Blood bag lo thleng hi chi li a ni a, Aizawl Civil Hospital-a an hman leh district hospital-a an hman a inang lo. ACH-ah chuan thisen ṭhen hranna awm (component seperation) chauh hman a ni a, district hospital-ah chuan khawl an neih loh avangin component sepaeration awm chi chu an hmang ve thei lo. Blood bag lo thleng zinga 3,510 chu Aizawl Civil Hospital-a hman chi a ni a, a bâk 4,600 chu damdawi-in dangah pawh hman theih chi a ni thung.

MSACS hotute chuan, blood bag chu an dawng dawn tih an hre bik lo tih sawiin, "NACO hian an intiam angin an rawn ti ṭhin lo a, hriatthiam a har ṭhin hle. Blood bag pawh hi September 2014 khan beisei turin min ti a, a lo thleng lo a, kumin January khan beisei turin min ti leh a, a rawn thleng chuang lo," an ti a; tuna a rawn thlen hmaa NACO aṭanga blood bag an dawn hnuhnun ber chu kum 2013 tâwp lamah a nih thu an sawi.

Zawhna chhangin MSACS hotute chuan, blood bag an dawn avangin thisen sawngbawlna man lak ṭhin Rs. 550 tihhniam a nih dawn lo tih sawiin, "Thisen sawngbawlna atan hian hman raw chi hrang hrang a ngai a, chungte chu kan dawng tel lo. Thisen sawngbawlna atan hian private-ah chuan Rs. 2,000 vel sen a ngai ang," an ti.

NACO aṭanga blood bag a lo thlen chungchangah hian nimin khan Lalruatkima, MLA chuan MSACS office a tlawh a, thil awm dan a zawtfiah a ni.

Tarlan tawh angin Mizoram sorkar chuan blood bag leh thisen sawngbawlna NACO aṭanga a thlawna dawn ṭhin tihtawp a nih avangin thisen sawngbawlna atan Rs. 550 lak a nih thu an sawi a ni.