MP model village chungchang zirho

State Institute of Rural Development (SIRD) buatsaihin nimin khan Chhiah­tlang community hall-ah MP Model Village programme, SAGY scheme kalpui mekah Chhiahtlang tihhmasawnna tur ruahmanna siamna, Participatory Rural Appraisal (PRA) inzirtir a ni.

PRA exercise hmanpuitu, Serchhip DC Juhi Mukherjee chuan, "Village Development Plan hi uluk taka siam a ṭul hle a, a zavaia tihhlawhtlin pawh thil awlsam tak a ni dawn lo. Khawtlang mipui inlung­rualna ṭha leh anmahni viltu sorkar department hrang hrangte nena thawhhona ṭha an neih bakah, anmahni thlangtu MP an thawhpui thiam danah thui tak a hlawhtlinna chu a innghat dawn a ni," a ti.

Juhi Mukherjee chuan model village ni tur chuan khawtlang mipuite hrisel ṭha bakah, chêt felfai te, nunphung zahawmte neih a ngaih dawn tih sawiin, "A bikin meizûk hi Mizo culture-a bet ni mah se, hriselna atana ṭha lo a nih avangin kalsan ngam a ṭul," a ti a; ṭhalaite'n zûk leh hmuam do kawngah ṭan la thar se a duh thu a sawi.

PRA exercise hi DRDA asst. project offi­cer Rohnuni'n a kaihruai a; SAGY line department hrang hrang aiawh te, Chhiah­tlang khawtlang aiawh tlawmngai pawl hrang hrang hruaitu te, V/C member-te leh Bharat Nirman Volunteer (BNV) te an tel a ni.