New Market leh a bul vela sumdawngte'n Bandh chungchanga an ngaihdan an sawi

Mizoramah total bandh huaihawt a ni zauh zauh a, total bandh huaihawttute'n an huaihawt chhante chu eng pawh ni se, Mizo mipui náwlpuiin total bandh chu ṭha an ti emaw, ti lo emaw, chawlhna remchangah an ngai niin a lang.

Thla bìa hlawh late leh chawlh pawha hlawh kiam chuang lote chuan bandh hi awm zauh zauh se an ti a ni mai thei a, ni bìa hlawh la ṭhin leh ni tin inhlawhfate erawh chuan bandh neih hi ṭha an ti vak lo pawh a nih thei. Chutih rualin, bandh ṭha tih leh tih loh chu bandh neih chhan azir a ni thei bawk.

Aizawl Saron Veng kawngpui sira thlai hnah/chawhmeh zuar pakhat chuan, bandh vangin a chawhmeh zawrh - tomato, anhnah leh parbawrte a ṭawih chhe hman ṭhin niin a sawi a, "Ni khat lek inpho thei loa awm hi a buaithlak thei khawp mai. Bandh hian kan eizawnna ber a nghawng pha a ni," a ti.

Saron Venga motor parking fee khawn nu pakhat chuan February 25-a MNF-in total bandh an siam chu a thlawp a, bandh siam chhan chu a hriat thu leh ṭha a tih thu a sawi a, "Mi rethei kan bet lutuk a, engkim mai a harsa a, thil man to lutuk nen, rethei tan nun ngaihna a awm tawh lo hial a ni," a ti al; chutih rualin, hna thawh chawlh hrim hrim chu an tan hlohna a nih thu a sawi.

Aizawl New Market luh dawn kawng sira inchhung mamawh zuar pa pakhat chuan, bandh hrim hrim chu dawrkaite chuan an thlawpa a hriat thu sawiin, "A chhan chu hahchawlh ve an châk vang a ni ber," a ti.

New Market-a chawhmeh zuar nu pakhat chuan ni khat bandh-in an eizawnna a nghawng hran lo tih a sawi a, bandh neih tur an hriat lâwk vek avangin chawhmeh chhe thei tur chu a man tlawm zawk pawhin an hralh zung zung mai ṭhin tih a sawi a, "Bandh chhan ṭha tih vang emaw, a huaihawttu thlawp vang ni kher loin, chawlh theihna remchang a ni a, kum khatah vawi ruk pawh bandh awm se pawi kan ti hran lo, chawlh hahdamna remchang a ni," a ti.

Thlai leh chawhmeh rêp zuartu chuan, 'Bandh an ti tak tak a nih chuan buai khawpin, ni hnih/thumte ti law law se, an hlawhtlinna tur a nih chuan," a ti a; zawhna chhangin, ni khat lekah tumah an buai lo a, bazar a inpho nuho pawhin harsatna an neih phah vak loa a hriat thu a sawi.

Chawhmeh zuar nu pakhat dang chuan, bandh neih tur chu hriat lâwk a nih vangin an inruahman fel vek ṭhin tih an sawi a, "Ni khat lek bandh vangin kan nghei lo ang a, kan thlawp ve tawp mai," a ti.

New Market secondhand lane-a ṭhu nuho chuan, bandh chu chawlh­na remchang ṭha tak a nih bakah, February 25-a MNF bandh huaihawt bik chu an tih chhan a ṭhat avangin an thlâwp tih an sawi. Bandh zawng zawng ṭha an ti lo a, bandh vangin sum pawh an hloh ve ngei tih an hria a, mahse sum váng lutuk te, bill chi hrang hrang sang chho zelte chu bandh neih chhan tlaka an ngaih thu an sawi a ni.

New Market-a ṭhu ve nu pakhat chuan, tui bill a sang a nih pawhin uchuak takin a sang tur­ah a ngai lo tih sawiin, "Pathianin a thlawn liau liaua min pek Tlawng lui aṭanga an lâk chhoh mai a ni," a ti.

Mi dang ve thung chuan, MNF-in bandh an siam chhan tur a hre lo a, mahse chawlh châk vangin bandh chu pawi a ti lem lo tih a sawi.

New Market-a sumdawng pakhat chuan, sum vàn chhan ber chu sorkarna chelh mektute vanga a ngaih thu a sawi a; chutih rualin, chhiah leh bill tihsan dodalna vangin kar khat pawh chawlh ngai se a thlâwp a rin thu leh chawlh an hreh loh thu a sawi.

New Market-a sa zuarte chuan ni khat chawlh vangin sum hloh mah se, bandh huaihawttu party thlawp vang ni loin, mipui thlan sorkarin mipui phurrit a siam mek chu mak a tih thu leh MNF bandh chu ṭha an tih thu an sawi hlawm a; chhiah pung nasa te, bill pungte chu mipui tan phurrit a nih thu an sawi bawk.