KHAWTHLIR

Mizoram sorkara secretary 27-te chuan nimin khan Covid-19 dona atan Chief Minister's Relief Fund-ah Rs. 3,30,500 an thawh. Nimin chhun thlenga CM Relief Fund for Covid-19 atana sum lut tawh zawng zawng chu Rs. 20,89,85,746 a ni a, Rs. 19,34,48,588 hman tawh a ni.

Horticulture changtu chief minister Zoramthanga chuan, September 3, Ningania Assembly session-ah INC member Zodintluanga Ralte zawhna chhángin, Horticulture department-in state páwn aṭangin mau/rua chi an la chah thlen loh thu nimin khan House a hrilh.

Assembly session neih zawh takah ZPM member C Lalsawivunga zawhna chhangin Power & Electricity minister R Lalzirliana chuan, kum 2019 chhungin electric bill aṭangin cheng nuai 24,775.52 hmuh a nih thu House a hrilh.

Vairengtea Covid-19 do hna thawktu hrang hrangte hman turin 3:16 Plan Solution neitu John Lalpeka, Khiangte Home Appliances neitu Laldinpuia Khiangte leh David Security Solution neitu David Malsawmsanga ten air cooler pakhat ṭheuh an pe a, Kolasib DC Dr H Lalthlangliana hnenah an hlàn. Air cooler bik chu Kolasib District MJA-in September 6 hian Vairengteah a hmangtu turte hnenah an hlân dawn a ni.

Fisheries minister K Lalrinliana chuan ZPM Legislature Party leader Lalduhoma zawhna ziaka chhángin, SEDP hnuaiah enchhinna angin crab farming kalpui mek a nih thu a tarlang a, "Crab farming hi Dumlui ram, Kolasib district-ah siam mek a ni. Hei hi enchhinna a ni," a ti.

Upa R Vanlalzauva lehkhabu ziah 'Hlawhtlinna Hi' tih chu nimin khan evangelist Dr Zadawla'n MFM School of Nur­sing-ah a tlangzarh.

State Referral Hospital-ah nimin khan Covid-19 vei mi pakhat leh rinhlelh mi pahnih dah luh a ni. SRH-ah hian hripui vei vangin mi 69 enkawl mek a ni a, mipa 53 leh hmeichhia 16 an ni. Kum 5 leh 78 inkar, sipai 11 leh civilian 58 niin, Mizo 45 leh hnam dang 24 an ni a; harsatna nei an awm lo a, ICU-a enkawl an awm tawh lo tih, SRH-ZMC Bulletin-in a tarlang.