MNF MLA-te'n buhfai man tih to an duh lo; Dan palzutin buhfai an supply tir - MLP

MNF Legislature Party (MLP)-te chuan nimin khan Aizawl Press Club-ah thuthar theh­darhtute kawmin, dan palzutin buhfai supply tur thlan a nih thu an sawi bakah, ration card var tana buhfai man tih tona sût an phût.

MLP leader Lalchhandama Ralte chuan, Supply department-ah nasa taka sorkar dan dinglai bawhchhiat avangin buhfai leinaah mipui sum tam tak mimal ṭhenkhat leh anmahni duhsaktute kutah a luanglut nia a lan thu sawiin, "Buhfai lei tura tender an chhuah danah dan dinglai nasa takin an bawhchhia a ni," a ti.

Mizoram Public Procurement Rules 2020 chuan limited tender/restricted tender hmangin cheng nuai 25 aia tam man thil lei a khap tih sawiin MLP leader chuan, "Supply dept.-in buhfai an leinaah hian he dan hi nasa takin an bawhchhia a ni," a ti a, cheng nuai sangbi man tender-ah hian earnest money pawh tenderer-te an dahtir loh thu a sawi.

Lalchhandama Ralte chuan tender chhang hniam ber RL Store, Kulikawnte chu dan palzuta hnawlin, nasa taka chhang sang zawk LZ Juice, Melthumte supply hna pek an nih thu a sawi a, "Supply dept.-in RTI Act dan anga zawhna an chhannaah tender chhang hniam ber RL Store Kulikawn an thlan loh chhan chu buhfai C Grade supply tura tender an chhan vang niin an tarlang," a ti.

MLP Leader sawi danin, RL Store-ten tender an chhanna copy-ah chuan buhfai A grade supply tura chhanna pe ngei an ni tih a lang a ni. Buhfai supply chungchanga dan bawhchhiatna hrang hrang avang leh tender chhang hniam ber supply hna pe loa a chhang sang zawk LZ Juice, Melthumte pek an nih avangin sorkar sum hloh hi a tam tham hle.

Supply Minister-in ZPM Ṭhalaite political training July 17, 2024-a a thusawiah, 'Buhfai supplier thlannaah ka inrawlh lo’ a ti niin media report an hmu. SPAB minutes hi file-ah Minister hian a approved ngei a ni tih notesheet-ah chiang takin a lang. Midang mawhpuha buhfai supplier thlannaa inrawlh lo anga insawi fo hi mipui leh SPAB ngei pawh zah lohna leh mawhphurhna lak ngam lohna a nih thu MLP Leader chuan a sawi.

MLP member-te chuan Supply department hmalakna-a ZPM sorkarin card var hmangtute tan buhfai kg. khat man 100%-a a tisang chu uchuak an tih thu sawiin, "Hetiang mi tam tak khawsak relna kawnga harsatna siam tur chungchanga rawtna inṭan dan leh thutlukna siam a nih dan hi keini MLP chuan pawm theih niin kan hre lo," an ti.

Buhfai chungchanga sorkar hmasate ro lo rel tawh dante leh mipuite zahpahna nei miah loa buhfai man 100% a tipungah ZPM sorkar puihin MLP member-te chuan, "Mipui aiawh NGO leh political party etc. ráwnin thutlukna siam chauh nise kan ti," an ti a, MNF chuan mipuite harsatna thlirin buhfai man a lêta tihpun an do tlat thu an sawi.

MLP member-te chuan ration buhfai chhungtin tana sorkarin a subsidised chu sorkar kal tawh zawngin zawngin an tih theih a nih thu sawiin, "Sum leh pai leh thildanga harsatna han tawh thut a awm lo chunga an titawp hi a mak hle. State dang lakah pawh chhungkaw tinin ration kan la bik hi kan in chhuan vena ṭhin a ni," a ti.

MLP tarlan danin, tunhnaiah Hachhek biala Mizo khaw hlun tak Phuldungsei khuaah Mizoram ration card neitu mi 85 chu an ration card paih sak (deleted) a ni. Hei hi hnam pawikhawihna lian tak a ni a, sorkar hmasa zawng zawngin Phuldungsei khua leh a mi chengte hi voters ID, ration card etc. hun rei tak aṭang khan an lo pe tawh ṭhin a ni.

A ram, khua hauh a ngai a, a mipuite pawh hauh tlat a ṭul lai leh Tripura sorkar chuan an duh lo chung pawha an ration card-te an delete duh reng reng lo. He hnam pawikhawihna lian takah hian ZPM Sorkar hian mawh a phur a, a demawm tak zet a ni.

MLP member-te chuan ZPM sorkar chu an tih loh tura an puan chhuahte ti mekah puhin, "Thla riat dawn an sorkar hnu hian an tih tura an sawi lam hi hawi ṭan ve tawh se," an ti a, ZPM sorkara CM, minister leh MLA-te chu ‘midangte aia dik bik leh ṭha bik’ nih an tum thu uar taka sawi ṭhinah puhin, thla 7 awrha upaah hian corruption a hluar hle niin an sawi.

Zawhna chhangin Serlui Bialtu MLA chuan, ramri chungchangah Home minister K Sapdanga'n thudik tawk lo a sawi nia sawiin, "Home Minister hian report a dawng dik lo nge, report pek tlakah an ngai lo. Dawhkan aṭang ringawt ni loin a hmunah rawn zirchiang ve se ramri mipuite'n an duh. Assam sorkar hian min zuam ang reng viau," a ti.